Angika News | अंगिका के मातृभाषा कोड लेली बिहार सरकार सँ केंद्र क प्रस्ताव भेजै के माँग विधानसभा मँ करलकै विधायक प्रो. ललित नारायण मंडल | Angika.com

 

पटना , 2 मार्च 2022 ।

सुलतानगंज ( भागलपुर) केरौ विधायक, प्रो. ललित नारायण मंडल नँ अंगिका क मातृभाषा कोड दिलबाबै आरू अंगिका क संविधान केरौ 8मो अनुसूची मँ शामिल कराबै के मुद्दा विधानसभा मँ उठाय क माँग करले छै कि एकरा लेली बिहार सरकार तरफो सँ  केंद्र सरकार क एगो प्रस्ताव भेजलो जाना चाहिय्यो   । 

 

बिहार विधानसभा सत्र मँ शून्यकाल के दौरान अंगिका क मातृभाषा कोड आरू अंगिका क संविधान केरौ 8मो अनुसूची मँ शामिल करबाबै के मुद्दा उठैतें विधायक, प्रो. ललित नारायण मंडल नँ बिहार सरकार सँ माँग करलकै कि अंगिका भाषा क अष्टम अनुसूची मँ डलबाबै लेली आरू अंगिका क मातृभाषा कोड जारी करबाबै के प्रस्ताव केंद्र सरकार क भेजलो जाय ।

अंगिका भाषा क मातृभाषा कोड दिलबाबै आरू 8मो अनुसूची मँ डलबाबै के मुद्दा प बिहार विधान सभा मँ बिहार सरकार सँ केंद्र क प्रस्ताव भेजै के माँग करतें जदयू विधायक प्रो. ललित नारायण मंडल

अंगिका.कॉम केरौ कुंदन अमिताभ सँ पिछला 13 फरवरी क रसीदपुर गाँव मँ बातचीत के क्रम मँ हुनी  ई सहमति व्यक्त करनै रहै कि हुनी अंगिका के मुद्दा क विधानसभा पटल प उठैतै। सथें हुनी दुःख जाहिर करलै छेलै कि अंग-प्रदेश केरौ विधायक आरू सांसद सिनी केरौ भाषा आरू संस्कृति के प्रति बरसों से जारी उदासीन रवैय्या के चलतें अंगिका भाषा आपनौ संवैधानिक हक सँ वंचित रहलो छै ।

 

विधायक, ललित नारायण मंडल नँ एगो सवाल के जबाब मँ अंगिका.कॉम क बतैने रहै कि जनगणना मैनुअल मँ अंगिका भाषा के मातृभाषा कोड डलबाबै  लेली जनता सिनी क आगू आबी क संगठित होय क आवाज बुलंद करै के जरूरत छै, साथ ही जनगणना आयोग, मुख्य मंत्री, प्रधान मंत्री सिनी क लगातार चिट्ठी लिखी क माँग करतें रहै के जरूरत छै । हुनी कहलै छेलै कि अंगिका भाषा क मातृभाषा कोड आवंटित करै के मामला केंद्र सरकार के अधिकार अंतर्गत आबै छै । जेकरा लेली बिहार सरकार तरफो सँ एगो प्रस्ताव भिजबाबै लेली हुनी प्रयास करतै ।