Angika News | बिहार विधानसभा के आगामी सत्र मँ विधायक ललित नारायण मंडल उठैतै अंगिका मातृभाषा कोड के मुद्दा | Angika.com

रसीदपुर ( भागलपुर), 14 फरवरी 2022 

सुलतानगंज ( भागलपुर) केरौ विधायक, ललित नारायण मंडल  25 फरवरी सँ शुरू होयवाला बिहार विधानसभा सत्र मँ अंगिका मातृभाषा कोड के मुद्दा उठैतै । अंगिका.कॉम केरौ कुंदन अमिताभ सँ बातचीत के क्रम मँ हुनी ई जानकारी देलकै। सथें दुःख जाहिर करलकै कि अंग-प्रदेश केरौ विधायक आरू सांसद सिनी केरौ भाषा आरू संस्कृति के प्रति बरसों से जारी उदासीन रवैय्या के चलतें अंगिका भाषा आपनौ संवैधानिक हक सँ वंचित रहलो छै । 

विधायक, ललित नारायण मंडल नँ एगो सवाल के जबाब मँ कहलकै कि जनगणना मैनुअल मँ अंगिका भाषा के मातृभाषा कोड डलबाबै  लेली जनता सिनी क आगू आबी क संगठित होय क आवाज बुलंद करै के जरूरत छै, साथ ही जनगणना आयोग, मुख्य मंत्री, प्रधान मंत्री सिनी क लगातार चिट्ठी लिखी क माँग करतें रहै के जरूरत छै । हुनी कहलकै कि अंगिका भाषा क मातृभाषा कोड आवंटित करै के मामला केंद्र सरकार के अधिकार अंतर्गत आबै छै । एकरा लेली राज्य सरकार तरफो सँ एगो प्रस्ताव भिजबाबै लेली हुनी प्रयास करतै ।

काल एकरो पहिने हुनी, दिवंगत डॉ. रामस्वरूप सिंह केरौ श्राद्ध कर्म के अवसर प रसीदपुर गाँव स्थित हुनको आवास प उपस्थित होय क पुष्प अरपित करी श्रद्धांजलि अरपित करलकै आरू शांति-भोज मँ जनता सथें  भोज करलकै ।