Angika News | अंगिका केरौ वरिष्ठ साहित्यकार डॉ. विक्रमादित्य विहंगम केरो कोरोना चलतें निधन | Angika.com
गोड्डा, 23 मई, 2021 ।
कोरोना नँ फेरू अंगिका केरौ एगो आरू वरिष्ठ साहित्यकार डॉ. विक्रमादित्य विहंगम केरौ जान ल लेलै छै । काल रात 22 मई क कोलकाता केरो कस्तूरी दास मेमोरियल सुपरस्पेशलिटी हॉस्पिटल मँ हुनको निधन होय गेलै।
डॉ. विक्रमादित्य विहंगम अंगिका आरू हिंदी केरो उदभट विद्वान्, लेखक, कवि, गीतकार, गज़लकर छेलै । हुनी स्थानीय पथरगामा महाविद्यालय केरो हिंदी विभाग के विभागाध्यक्ष रहै ।
अखिल भारतीय अंगिका, हिंदी साहित्य कला मंच- झारखण्ड नँ डॉ विहंगम के असामयिक निधन क समाज आरू प्रदेश लेली अपूरणीय क्षति बतैने छै । मंच नँ कहलै छै कि विहंगम जी के निधन के भरपाई करना आबै वाला समय मँ मुश्किल होतै ।
 |
| डॉ. विक्रमादित्य विहंगम |
डॉ विहंगम एगो जानलो-मानलो शोध आरू अनुसंधानकर्ता छेलै । हुनको मार्गनिर्देशन मँ सीधोकान्हू विश्वविद्यालय सँ दर्जनों शोधार्थी नँ पी एच डी के उपाधि प्राप्त करलकै ।
डॉ विहंगम के असामयिक निधन प अखिल भारतीय अंगिका, हिंदी साहित्य कला मंच केरो संरक्षक- डॉ मनोज कुमार राही, महासचिव -डॉ प्रदीप प्रभात, अध्यक्ष -डॉ ब्रह्मदेव कुमार नँ अश्रु पूरित श्रद्धांजलि अर्पित करतें संयुक्त बयान जारी क आपनो संवेदना जाहिर करतें कहलै छै कि दुःख केरौ इ घड़ी मँ हम्में सिनी मर्माहत छियै । मंच नँ हुनका शत शत नमन करतें हुअय श्रद्धा सुमन अर्पित करलै छै आरू प्राथना करतें कहले छै कि भगवान हुनको परिवार क सहनशीलता आरू धैर्य प्रदान करअ आरू हुतात्मा क अपनो हृदय मँ स्थान दिअय ।
अंगिका.कॉम के संस्थापक, कुंदन अमिताभ नँ डॉ. विक्रमादित्य विहंगम के निधन क अंगिका के बहुत बड़ौ छति बतैनै छै । डॉ. विहंगम क श्रद्धांजलि देतें हुनी कहलकै कि सौसे अंगिका जगत हुनको योगदान क सदैव याद राखतै ।
No comments:
Post a Comment