Angika News | अंगिका के शेक्सपियर, भगवान प्रलय के निधन, अंग प्रदेश मँ शोक के लहर | Angika.com
कटिहार (बल्थी महेशपुर, कुर्सेला), 2 मई, 2021 ।
काल 1 मई क अंगिका केरौ सर्वाधिक जनप्रिय आरू राष्ट्रीय कवि भगवान प्रलय केरौ निधन होय गेलै । हुनी 78 बरस के छेलै ।
अंगिका.कॉम सँ बात करतें हुनको बेटा श्री रजनीश जी नै बतैलके कि पिछला पाँच - छो दिना सँ प्रलय जी के तबीयत ठीक नै चली रहलौ छेलै । छाती मँ दर्द के शिकायत पर डाक्टर सँ इलाज भी चली रहलो छेलै । काल रात अचानक हुनको तबीयत जादे खराब होय गेलै आरू हुनी आपनौ नश्वर देह त्यागी देलकै ।
 |
| अंगिका के शेक्सपियर, भगवान प्रलय |
दिवंगत श्री भगवान प्रलय केरौ जन्म 15 अगस्त 1942 ई. क अंग प्रदेश केरो कटिहार जिला केरौ बल्थी महेशपुर गाँव मँ पिता- गोनर चौधरी आरू माता- जिलेबा दाय के संतान के रूप मँ होलौ रहै । हुनी अंगिका भाषा मँ अनगिनत गीत, कविता, नाटक,उपन्यास के रचना करलकै । हुनको प्रकाशित पुस्तक मँ गीत मेरे मीत (अंगिका गीत संग्रह) काफी लोकप्रिय छै । जबकि हुनको द्वारा अंगिका मँ रचित कुमारी कौशिका (नाटक), महुआ घटबारिन (नाटक), महुआ घटबारिन (उपन्यास), महुआ घटबारिन (अंगिका लोक गाथा संग्रह) अभी तलक अप्रकाशित छै । हुनको स्कूली शिक्षा- दसमा तलक होलो रहै । हुनका अनगिनत उपाधि- कवि रत्न, लोक भूषण, अंग प्रसून, अंग श्री, अंग भागीरथ, अजः रत्न, अंग पतंग, गीत कुल गौरव, गीतकार कुल शिरोमणि आरनि सँ सम्मानित करलौ गेलौ रहै । हुनी आजीवन स्वतंत्र लेखन, गीत-संगीत आरू नाट्य निर्देशन मँ अपना क मशगूल राखी क अंगिका भाषा आरू अंग संस्कृति के विकास मँ लागलो रहलै ।
श्री भगवान प्रलय जी के परिवार मँ हुनको धर्मपत्नी के अलावा पाँच संतान गीतांजली, रजनीश, पुष्पांजली, नित्यप्रिया, सुमन छै ।
श्री भगवान प्रलय केरौ निधन सँ अंगिका साहित्यिक जगत मँ शोक के लहर फैली गेलौ छै ।
अंगिका.कॉम के संस्थापक, कुंदन अमिताभ नँ श्री भगवान प्रलय क अंगिका के शेक्सपियर बतैतें कहलै छै कि अंगिका केरौ ई नुकसान के भरपाई असंभव छै । प्रलय जी के जाना बहुत दुःखद छै ।
हुनका निधन पर सैकड़ों लोगों नँ आपनौ श्रद्धांजलि व्यक्त करलै छै ।
No comments:
Post a Comment