Angika जनम-दिन विशेष | अंग सपूत दिनकर केरौ साहित्य मँ राष्ट्रीय चेतना केरौ स्वर लहराबै छै - by अंशु माला झा 'अंश' | Anshu Mala Jha 'Ansh'

अंग केरौ गौरव राष्ट्र कवि रामधारी सिंह दिनकर जी केरौ जयंती पर हुनका शत-शत नमन करै छियै। हुनको जन्म बेगूसराय केरौ सिमरिया गाँव मँ होलौ छैले। हुनकौ जिनगी बहुत कष्टौ सँ बितलौ रहै। हुनी खालिये गोड़ स्कूल जाय रहै । धिपलौ बालू प बूलै नै सकै छेलै त काठौ केरौ पटरा धरी क बुलै छेलात। 

1999 ई. मँ रामधारी सिंह दिनकर के उपर जारी करलौ गेलौ डाक-टिकट

बहुत संघर्ष स हुनी आगू बढ़लै। माटी केरौ सच्चा पूत रहै। हुनको व्यक्तित्व आरु कृतित्व दूनो महान छै। हुनको व्यक्तित्व मँ साहित्य केरौ छाँव आरु राजनीति केरौ रौद भी छै। 

 

समाज आरु भारतीय  संस्कृति केरौ ऐना छेकै हुनकौ साहित्य। दिनकर केरौ साहित्य मँ राष्ट्रीय चेतना केरौ स्वर लहराबै छै। कविता रहै या गद्य रचना सब्भे ‌केरौ महत्व अमूल्य छै।

 

रश्मि-रथी पाठ केरौ जोड़ आय तलक कोय नै दियै सकलौ छै। हुनी अंग केरौ गौरव कर्ण पर ही रश्मि-रथी लिखनै छथिन। भागलपुर हुनको कर्म भूमि रहै। उर्वशी महाकाव्य लेली ज्ञानपीठ पुरस्कार सँ सम्मानित ‌होलो रहथिन। 

 

अंग रत्न सचमुच मँ सूर्य रहै। दिनकर केरौ मानै भी त सूर्य ही होय छै। हुनी सोझे आगू बढ़लै गेलै पीछू घुरी क नै देखलकै ।

 

हुनी  हमरा सिनी के प्रेरणा छिकात। है अंग सपूत क कोटि-कोटि नमन!  हुनको ई प्रेरणाप्रद पंक्ति मनौ मँ ठौर बनाय क हमरा सदैव प्रेरणा देतें रहै छै - 

"थक कर बैठ गए हो राही ? मंजिल दूर नहीं है।"

लेखिका - अंशु माला झा 'अंश'

 

Angika जनम-दिन विशेष | अंग सपूत दिनकर केरौ साहित्य मँ राष्ट्रीय चेतना केरौ स्वर लहराबै छै - by अंशु माला झा 'अंश' | Anshu Mala Jha 'Ansh'