Angika.com | अंग-क्षेत्र मँ भारतीय पुरातत्व सर्वेक्षण केरौ सर्किल के स्थापना के माँग | News in Angika

मुंबई, 2 सितंबर,2020 ।आय भारत सरकार सँ माँग करलौ गेलौ छै कि अंग क्षेत्र मँ भारतीय पुरातत्व सर्वेक्षण केरौ सर्किल के स्थापना करलौ जाय ।

 

अंग-अंगिका विकास मंच नँ भारत सरकार केरौ संस्कृति व पर्यटन राज्य मंत्री (स्वतंत्र प्रभार) श्री प्रहलाद सिंह पटेल सँ कहलै छै कि पुरातात्विक दृष्टि सँ महत्वपूर्ण रहला के बावजूद अंग के क्षेत्र अखनी तलक पुरातात्विक सर्वेक्षण के मूलभूत संरचना के सुविधा सँ वंचित आरू उपेक्षित छै। जबकि अंग क्षेत्र मँ नयौ खोज आरू शोध के अपार संभावना छै ।

 

संस्कृति व पर्यटन राज्य मंत्री (स्वतंत्र प्रभार) श्री प्रहलाद सिंह पटेल

अंग-अंगिका विकास मंच केरौ राष्ट्रीय महासचिव कुंदन अमिताभ नँ नक्शा जोड़तें हुअय श्री पटेल सँ माँग करलै छै कि जल्द सँ जल्द अंग क्षेत्र केरौ बाँका, भागलपुर, मुंगेर, पूर्णिया, मधेपुरा, सहरसा, देवघर, दुमका आरनि 26 जिला लेली भारतीय पुरात्तव सर्वेक्षण केरौ एगो नया सर्किल के स्थापना करलौ जाय । 

 

श्री अमिताभ के अनुसार सर्किल के स्थापना सँ आरू चीज के अलावा यहाँकरौ लोगौ लेली रोजगार के संभावना केरौ नया अवसर भी पैदा होतै ।

 

श्री कुंदन अमिताभ के अनुसार पौराणिक आरू ऐतिहासिक महत्व के अंग क्षेत्र मँ कलाकृति सिनी के पंजीकरण के साथ-साथ पुरातात्विक स्मारको के संरक्षण आरू पंजीकरण केरौ प्रक्रिया क सुविधाजनक आरू मजगूत बनाबै लेली ई बहुत जादा जरूरी छै कि भारतीय पुरातत्व सर्वेक्षण केरौ सर्किल के स्थापना अंग-क्षेत्र मँ करलौ जाय । प्राचीन भारत केरौ गौरवशाली 16 महाजनपदौ मँ सँ एक अंग महाजनपद केरौ अंगिका भाषा, अंग लिपि , अंग संस्कृति आरनि सँ जुड़लौ कईएक महत्वपू्र्ण आयाम के बिखरलौ पड़लौ धरोहर आऱू ओकरौ अवशेष के संरक्षण व ओकरा सँ जुड़लो तथ्यौ के  गहन अध्ययन लेली भी ई जरूरी छै कि भारतीय पुरातत्व सर्वेक्षण केरौ एगो केंद्र अंग-क्षेत्र मँ स्थापित हुअय ।

श्री अमिताभ के अनुसार अखनी तलक बिहार, झारखंड सब मिलाय क पटना आरू राँची मात्र दू ठो सर्किल छै । जबकि पं बंगाल मँ असकल्ले दू-दू ठो सर्किल कोलकाता, आरू रायगंज छै । बिहार-झारखंड केरौ एतना बड़ौ क्षेत्र लेली खाली दू ठो सर्किल होना अपर्याप्त छै । भौगोलिक असुविधा के चलतें अंग-क्षेत्र जैसनौ पुरातात्विक विरासत के दृष्टिकोण से अंतर्राष्ट्रीय महत्व के स्थान पुरातात्विक खोज के मूलभूत सुविधा सँ वंचित रही गेलौ छै ।

 

श्री अमिताभ नँ आशा व्यक्त करलै छै कि भारत सरकार अंग क्षेत्र मँ जल्द सँ जल्द भारतीय पुरातत्व सर्वेक्षण केरौ सर्किल के स्थापना के घोषणा करतै ।