Angika.com | बल्लीकित्ता गाँव के महिला लोक-कलाकार सिनी ऑनलाइन लाइव सुनैलकै अंगिका बीहा संस्कार गीत | News in Angika

बल्लीकित्ता (बाँका) / भागलपुर, 8 सितंबर, 2020 । भागलपुर इप्टा तर्फो सँ आय साँझैं आयोजित ऑनलाइन लाइव प्रोग्राम, "अंग-राग" मँ अंग-प्रदेश केरौ ग्रामीण महिला लोक-कलाकार सिनी नँ अंगदेश मँ प्रचलित अंगिका बीहा-संस्कार गीतो सिनी के प्रस्तुति देलकै । लाइव कार्यक्रम के प्रसारण भागलपुर इप्टा फ़ेसबुक आऱू जूम ऐप प एक साथ करलौ गेलै ।

 

बाँका के बल्लीकित्ता केरो महिला लोक-कलाकार सिनी नँ अंग-प्रदेश मँ बीहा संस्कार लेली गैलो जाय वाला अंगिका भाषा केरौ उबटन, लघेरौ, बिलोकी, घिढारी, कोहबर आरू बिदाई गीत के अलावा एगो बेटी गीत भी गैलकै ।

अंगिका संस्कार गीत गाबै वाला अंग-प्रदेश केरौ महिला लोककलाकार के जेरो मँ शामिल छेलै - सीता देवी, सुलेखा देवी, सोनी देवी, मनोरमा देवी, रानी देवी आरू बसंती देवी आरनि ।

मोबाइल केरौ कमजोर नेटवर्क रहला के बावजूद भागलपुर इप्टा तर्फो सँ अंगिका संस्कार गीत केरौ ई शानदार-जानदार लाइव प्रस्तुति,अंग-प्रदेश केरौ मशहूर लोक कलाकार, अंग-गौरव  श्वेता भारती केरौ निर्देशन मँ संपन्न भेलै ।  जबकि लाइव प्रोग्राम केरौ संचालन श्री रितेश जी नँ करलकै ।

भागलपुर इप्टा तर्फो नँ लाइव प्रोग्राम के माध्यम सँ अंग-प्रदेश के अलावा मुंबई, दिल्ली आरू देश केरौ कोना-कोना सँ जुड़लो दर्शक सिनी के प्रति आभार व्यक्त करतें आहवान करलकै कि अंग देश केरौ समृद्ध लोक परंपरा आरू लोक संस्कृति सँ जुड़लो संस्कार गीत केरौ संरक्षण लेली आगू आबौ ।

 

भागलपुर इप्टा नँ दर्शक सिनी क सूचित करलकै कि आबै वाला सप्ताह मँ भी अंगिका भाषा आरू अंग संस्कृति सँ जुड़लो ऐसनौ कार्यक्रम सब निरंतर प्रसारित करलो जैतै । 

साथें हुनका तरफौ सँ  बतैलो गेलै कि आबै वाला शनिवार क एगो कार्यक्रम होतै जेकरा मँ अंगिका भाषा केरौ कथाकार श्री पी.एन.जयसवाल , श्री विनय कुमार आऱू तिलकामाँझी भागलपुर विश्वविद्यालय केरौ अंगिका भाषा विभागाध्य़क्ष श्री प्रेम प्रभाकर जी भाग लेतै ।

 

 ।।लाइव प्रोग्राम केरौ रेकॉर्डेड वीडियो देखै ल ऐन्जाँ क्लिक करियै ।।

 

Women folk artists of Ballikitta village of Anga Pradesh came online - live and narrated Angika wedding ceremony songs to the nation.