भागलपुर एयरपोर्ट क जल्दी सँ घरेलू,अंतर्राष्ट्रीय उड़ान लेली विकसित करै के माँग | News in Angika

मुंबई, 25 अगस्त, 2020 । अखिल भारतीय अंग-अंगिका विकास मंच नँ भारत सरकार केरौ केंद्रीय नागरिक उड्डयन मंत्री श्री हरदीप सिंह पुरी सँ आग्रह करनै छै कि भागलपुर एयरपोर्ट क जल्दी सँ जल्दी घरेलू आरू अंतर्राष्ट्रीय विमान के उड़ान भरै लेली विकसित करलौ जाय ।

अखिल भारतीय अंग-अंगिका विकास मंच केरौ राष्ट्रीय महासचिव कुंदन अमिताभ नँ केंद्रीय नागरिक उड्डयन मंत्री श्री हरदीप सिंह पुरी आरू बिहार केरौ मुख्यमंत्री श्री नीतिश कुमार क ट्वीटर के माध्यम सँ कहलै छै कि भागलपुर बिहार केरौ एगो प्रमुख शहर छेकै, जहाँ दशकों सँ एगो छोटो रकम के हवाई अड्डा बनलो परलो छै । लेकिन यहाँ सँ नै त कोनो घरेलू विमान भरलो जाय छै नै ही कोनो अंतर्राष्ट्रीय उड़ान ही । 

श्री कुंदन अमिताभ नँ केंद्रीय नागरिक उड्डयन मंत्री श्री हरदीप सिंह पुरी आरू बिहार केरौ मुख्यमंत्री श्री नीतिश कुमार क ट्वीट के माध्यम सँ पुछले छै कि आखिर भागलपुर एयर पोर्ट कहिय्या तलक घरेलू आरू अंतर्राष्ट्रीय विमान के उड़ान भरै लेली विकसित होय जैतै ?