Angika.com | पूर्व राष्ट्रपति भारत रत्न प्रणव मुखर्जी केरौ 84 साल मँ निधन | News in Angika

नई दिल्ली, 31 अगस्त, 2020 । भारत केरौ पूर्व राष्ट्रपति भारत रत्न श्री प्रणव मुखर्जी केरौ निधन होय गेलौ छै । हुनी 84 साल के छेलै । हुनी बहुत दिना सँ अस्पताल मँ भरती छेलै ।

 

हुनका दिल्ली स्थित सैन्य अस्पताल रिसर्च एंड रेफरल मँ भरती करैलौ गेलौ रहै । अस्पताल मँ भरती करैतें वक्त बतैलौ गेलौ रहै कि हुनको ब्रेन मँ लहू केरौ थक्का जमी गेलौ रहै जेकरो कि इमरजेंसी ऑपरेशन करलौ गेलौ रहै । बाद मँ हुनको फेफड़ा मँ संक्रमण होय के बात भी सामने ऐलौ छेलै । साथ मँ हुनी कोरोना वायरस - कोविड-19 सँ भी संक्रमित छेलै, जेकरो जानकारी खुद प्रणव मुखर्जी नँ देनै रहै ।

 

श्री प्रणव मुखर्जी साल 2012 सँ 2017 तलक भारत केरौ राष्ट्रपति छेलै । हुनका भारत रत्न सँ भी सम्मानित करलौ गेलौ छेलै । राष्ट्रपति बनला सँ पहनै हुनी काँग्रेस केरौ नेता छेलै । काँग्रेस केरौ यू.पी.ए. सरकार के दौरान हुनी विदेश मंत्री, रक्षा मंत्री, आरू वित्त मंत्री जैसनौ महत्वपूर्ण पद क सँभाललै छेलै ।

 

श्री प्रणव मुखर्जी केरौ राजनीतिक कैरियर केरौ शुरूआत साल 1969 मँ होलौ रहै , जबै इंदिरा गाँधी नँ हुनका राज्यसभा केरौ टिकट देनै रहै । ओकरो बाद हुनी साल 1975, 1981, 1993, 1999 मँ भी राज्यसभा केरौ सदस्य के तौर प चुनलो गेलो रहै ।

 

हुनका मनमोहन सिंह केरौ सरकार के दौरान अमरीका सथैं होलो परमाणु संधि मँ अहम भूमिका निभाबै ल जानलौ जाय छै ।  हुनी तखनी भी चर्चा मँ ऐलौ छेलै जबै आपनौ राष्ट्रपति केरौ कार्यकाल खतम करला के बाद आर.एस.एस. केरौ एगो कार्यक्रम मँ शामिल होलो रहै । तखनी बहुत्ते काँग्रेसी नेता सिनी नँ एकरो विरोध करनै रहै । 

हुनको निधन प राष्ट्रपति, उपराष्ट्रपति, प्रधानमंत्री, गृह मंत्री, रक्षा मंत्री, राज्यौ के मुख्यमंत्री आरनि नँ गहरा शोक व्यक्त करलै छै ।

 

अंग-अंगिका विकास मंच के महासचिव आरू अखिल भारतीय अंगिका साहित्य कला मंच केरौ राष्ट्रीय उपाध्यक्ष कुंदन अमिताभ नँ  पूर्व राष्ट्रपति, भारत रत्न श्री प्रणव मुखर्जी केरौ निधन क दुःखद  बतैनै छै। करोड़ों अंगिका भाषा भाषी तरफौ सँ हुनका हार्दिक श्रद्धांजलि व्यक्त करतें हुनी कहलकै कि श्री प्रणब मुखर्जी केरौ निधन सँ राजनीति केरौ एक युग समाप्त होय गेलै।

ई बीच , श्री प्रणव मुखर्जी केरौ निधन के बाद भारत सरकार द्वारा  देश भरी मँ सात दिना के राजकीय शोक के घोषणा करलौ गेलौ छै ।

 

दिवंगत गणमान्य शख्सियत के प्रति सम्मान केरौ प्रतीक के रूप मँ पूरे भारत मँ सात दिन केरौ राजकीय शोक 31.08.2020 सँ 06.09.2020 तलक लागू रहतै । ई अवधि के दौरान भारत मँ वू सब भवनो पर राष्ट्रीय ध्वज आधा झुकलो रहतै, जैन्जां एकरा नियमित रूप सँ फहरैलौ जाय छै । साथैं कोय प्रकार के आधिकारिक मनोरंजन के कार्यक्रम नै होतै ।

राष्ट्रीय सम्मान के साथ अंतिम संस्कार केरौ तारीख, समय आरू स्थल के सूचना बाद मँ देलो जैतै।

 राष्ट्रीय सम्मान के साथ अंतिम संस्कार 1 सितंबर,2020 क लोदी रोड स्थित श्मशान घाट मँ करीब दू बजे दोपहर क करलौ जैतै । ओकरो पहनै हुनको पार्थिव शरीर क अंतिम दर्शन लेली हुनको निवास स्थान (10, राजा जी मार्ग, नई दिल्ली) प भोरे सवा नौ बजे सँ 12 बजे तलक रखलौ जैतै ।

First Published : 31-8-2020

Last Edited: 1-9-2020