सादगी आरू सावधानी सँ मनैलौ जाय रहलौ छै गणेश चतुर्थी व चरचंदा परब | News in Angika

खारघर (नवी मुंबई) / खानपुरमाल (भागलपुर), 22अगस्त,2020 । महाराष्ट्र केरौ मुख्यमंत्री केरौ अपील के अनुरूप कोरोना के माहौल मँ महाराष्ट्र मँ ई दाफी गणेश चतुर्थी केरौ उत्सव क काफी सादगी सँ मनैलौ जाय रहलौ छै । साथैं सावधानी भी काफी रखलौ जाय रहलौ छै ।  ओन्हैं अंगदेश मँ भी गणेश चतुर्थी के परब चरचंदा के रूप मँ घरे-घर सादगी सँ मनैलौ जाय रहलौ छै ।

बाजार सँ मुरती नै खरीदी क घरै प बनैलौ मुरती क बठैलौ गेलौ छै ।

कभी गाजा-बाजा के साथ भव्य तरीका सँ ई परब क सेलिब्रेट करै वाला सिलेब्स के यहाँ भी ई बार चतुर्थी क बहुत ही साधारण तरीका सँ मनैलौ जाय रहलौ छै । 

बड़ौ-बड़ौ सोसायटी मँ भी बड़ौ-बड़ौ मूरती के जग्घौ प छोटो-छोटो मुरती बठैलौ गेलो छै ।

यहाँ तलक की स्थापित करलौ गेलौ मुरती केरौ दर्शन डिजीटल माध्यम सँ करैलौ जाय रहलौ छै । घरौ मँ बठैलौ मुर्ती क भी वाट्सअप सँ शेयर करी क दर्शन करैलौ जाय रहलौ छै । केकरो घर जाय क मुर्ती के दर्शन करै के आम प्रचलन बंद छै ।

हिन्ने अंग देश केरौ गामौ सँ ल करी क शहरौ तक के जनानियें सिनी चरचंदा के बरत रखलकै आरू साँझ क चाँद क अर्घ्य देलकै । एकरो पैहने भरी दिन निर्जला उपवास रखलौ गेलै । 

चरचंदा के पूजा साँझ क चाँद निकलला के बाद ही होय छै । भर दिन निर्जला उपवास रखला के बाद परबैतिनी सिनी सूप मँ फल, परसादी, दही रखी क चाँद क अर्घ्य दै छै । एकरो बाद पारण होय छै । अंग देश मँ गणेश चतुर्थी के परब सदियों सँ चरचंदा के रूप मँ ही मनैलौ जाय छै ।