15 जुलाई तलक जारी होय जैतै CBSE आरू ICSE केरौ 10वां आरू 12वां के रिजल्ट | News in Angika

ऩई दिल्ली, 26 जून, 2020 । केंद्रीय माध्यमिक शिक्षा बोर्ड (CBSE) आरू काउंसिल फॉर द इंडियन स्कूल सर्टिफिकेट एग्जामिनेशन (ICSE) नँ सुनवाई के दौरान सुप्रीम कोर्ट क बतैलै छै कि 10वां आरू 12वां कक्षा के रिजल्ट क 15 जुलाई तलक घोषित करी देलौ जैतै । एकरौ अलावे CBSE नँ बचलौ बिषय के परीक्षा लेले बिना विद्यार्थी क मार्क्स केना देतै एकरा पर भी हलफनामा दायर करी क जानकारी देनै छै ।

ICSE केरौ प्रेस रिलीज आरू सुप्रीम कोर्ट केरौ निर्णय के कॉपी

CBSE केरौ Notification के कॉपी

CBSE केरौ हलफनामा के मुताबिक 10वां आरू 12वां कक्षा के छात्रौ क मार्क्स दै लेली जे फॉर्मूला अपनैलौ जैतै वू निम्नांकित छै;
-जे छात्र 3 सँ ज्यादा परीक्षा देलै छै तो ओकरा बेस्ट ऑफ 3 के एवरेज सें बचलौ विषयौ के मार्क्स मिलतै ।
-जे छात्र 3 परीक्षा देलै छै ओकरा बेस्ट ऑफ 2 के औसत सें बचलौ विषयो के मार्क्स मिलतै ।
-जे छात्र 1 या 2 परीक्षा ही देलै छै ओकरा आंतरिक मूल्यांकन या प्रैक्टिकल के औसत के आधार पर मार्क्स  देलौ जैतै ।

हालांकि ICSE तरफौ सँ सुप्रीम कोर्ट में ई भी कहलौ गेलै कि वू 12वां कक्षा के अलावा 10वां कक्षा के छात्र क भी बाद मँ परीक्षा दै के विकल्प दिअय सकै छै । ICSE नँ कहलकै कि ओकरौ मार्क्स दै के तरीका CBSE सँ अलग होतै ।

ICSE केरौ वकील नँ कहलकै कि हुनी भी परीक्षा रद्द करी रहलौ छै, हमरौ मार्किंग के तरीका CBSE सँ तनी अलग होतै ।

मार्किंग के तरीका आरू बाद में आयोजित करलौ जाय वाला परीक्षा क ल करी क दोनो बोर्ड अपनौ-अपनौ नोटिफिकेशन जारी करतौ ।

सुप्रीम कोर्ट के अलावा कोय भी हाईकोर्ट मँ ई मामला पर सुनवाई नै होतै ।