दू दिवसीय अंगिका महोत्सव-२०२० आय सँ तिलकामाँझी भागलपुर मँ | News in Angika

भागलपुर, १ फरवरी, २०२० । तिलकामाँझी क्षेत्र मँ आय सँ दू दिना तलक चलै वाला अंगिका महोत्सव - २०२० केरौ शुरू भ रहलौ छै । ई क्रम मँ यहाँ देस केरौ हर कोना सँ आमंत्रित अतिथि आरू अंगिका प्रेमी सिनी के हूजूम एक दिना पहिनै सँ जुटना शुरू भ गेलौ छै । महोत्सव केरौ उद्घाटनकर्ता  भागलपुर वि.वि. केरौ पहलकरौ कुलपति डॉ. रामाश्रय यादव कल राती भागलपुर पहुँची चुकलौ छै ।

झारखंड विधान सभा मँ अंगिका भाषा मँ विधायक कार्यकाल के शपथ लै वाला गोड्डा विधायक श्री अमित मंडल व देवघर विधायक श्री नारायण दास मुख्य अतिथि के रूप मँ आय मंच प उपस्थित रहतै । कार्यक्रम के अध्यक्षता डॉ. मधुसूदन झा करतै । मुख्य वक्ता प्रो. (डॉ.) बहादुर मिश्र रहतै ।

जबकि विशिष्ठ अतिथि के रूप मँ  श्रीमती सीमा साह, डॉ. एन.के.यादव, डॉ. शंभूदयाल खेतान,  लखनलाल पाठक,  राजेश वर्मा, डॉ. एस.एन.पांडेय, शिव कुमार शिव, रंजन, सैयद शाह फकरे आलम हसन, प्रसून लतांत, कुंदन अमिताभ, दिनेश बाबा तपन, डॉ. मीरा झा,  शशिधर मेहता  आरनि के उपस्थित रहै के संभावना छै ।

कार्यक्रम के संयोजक गौतम सुमन प्रतिवेदन के पाठ करतै । भागलपुर केरौ पूर्व महापौर, श्रीमती वीणा यादव स्वागताध्यक्ष के रूप मँ आगत अतिथि आरू अंगिका प्रेमी सिनी के स्वागत करतै ।कार्यक्रम संचालन के जिम्मेवारी आकाशवाणी भागलपुर केरौ पू्र्व उद्घोषिका श्रीमती अंशुमाला झा आरू श्री केशरी तिवारी, उदघोषक आकाशवाणी भागलपुर, दून्हूँ के काँधौ प रहतै ।

कार्यक्रम  मँ अंगिका के किताबौ के लोकार्पण के अलावा अंगिका लोकनृत्य, अंगिका नाटक, अंगिका लघु फिल्म, विचार गोष्ठी, कवि गोष्ठी आदि के आयोजन वृहत स्तर प होतै ।

अंगिका लोकनृत्य मँ झिझिया, जट-जाटिन आरू गोदना केरौ प्रस्तुति ताल नृत्य संस्थान, भागलपुर तरफौ सँ करलौ जैतै । जबकि अंगिका नाटक मँ,पहलौ दिन- बाबा विशु रावत, पोंगा पंडित, दौसरौ दिना - सती बिहुला आरू सफदर के बोल केरौ प्रस्तुति क्रमशः कला सागर सांस्कृतिक संस्थान, रंग ग्राम सांस्कृतिक संगठन, कृष्णा क्लब, बरारी व संबंध नाट्य सांस्कृतिक संगठन केरौ ओर सँ करलौ जैतै ।

पहलौ दिना, अंगिका लघु फिल्म, मड़सटका भात केरौ प्रस्तुति रंग ग्राम सांस्कृतिक संगठन केरौ सौजन्य सँ करलौ जैतै ।

दू फरवरी केरौ कार्यक्रम के उद्घाटन डॉ. तेजनारायण कुशवाहा करतै ।पहलौ सत्र के मुख्य अतिथि के रूप मँ डॉ. एन के. यादव, डॉ. डी.पी.सिंह मंचासीन रहतै । कार्यक्रम के अध्यक्षता हीरा प्रसाद हरेंद्र करतै । मुख्य वक्ता अनिल कुमार झा रहतै ।स्वागताध्यक्ष रहतै डॉ. वीणा यादव आरू कार्यक्रम के संचालन करतै गीतकार राजकुमार । ई सत्र मँ अति विशिष्ट अतिथि के रूप मँ प्रशांत मंडल, राजेश रंजन, डॉ. गायत्री देवी, डॉ. विद्या रानी, प्रो.(डॉ.) रतन मंडल, डॉ. प्रेम प्रभाकर, श्री आमोद कुमार मिश्र, कैलाश ठाकुर, डॉ. प्रदीप प्रभात, डॉ. अजय कुमार सिंह, डॉ. अशोक कुमार आलोक, ईं. अंशु सिंह, संजीव कुमार आरू विशिष्ट अतिथि के रूप मँ आर.के.नीरद, विकास पांडेय, प्रेमचंद पांडेय, रथेन्द्र विष्णु नन्हें, प्रणय प्रियंवद, डॉ. मनोज मीता, कैलाश झा किंकर, राहुल शिवाय, विधुशेखर पांडेय, डॉ. संयुक्ता भारती, सुजाता कुमारी, शतजल मंजरी, माध्वी चौधरी, नंदलाल सारस्वत, सुभाष यादव, त्रिलोकीनाथ दिवाकर, प्रीतम विश्वकर्मा कवियाठ, देवेन्द्रनाथ दिलवर, राजीव बनर्जी, जी.पी.सिंह आनंद मंचासीन रहतै ।

जबकि दोसरो दिना के दोसरौ सत्र मँ विराट अंगिका कवि सम्मेलन आयोजित होतै । जेकरो संचालन सुधीर कुमार प्रोग्रामर करतै । ई सत्र के अध्यक्षता गीतकार लक्ष्मीनारायण मधुलक्ष्मी करतै । मुख्य अतिथि के रूप मँ शिवनंदन सलिल मंचासीन रहतै । ई सत्र मँ विशिष्ट अतिथि के रूप मँ अश्विनी प्रजावंशी, दयानंद जयसवाल,अंजनी कुमार शर्मा, साथी सुरेश सूर्य, विजेता मुद्गलपुरी, गौतम यादव, विकास सिंह गुल्टी, अंजनी सुमन, नवीन निकुंज, परमानंद प्रेमी, प्रकाश सेन प्रीतम, ब्रह्मदेव कुमार, शिप्रा जी, जयंत जलद, कुमार गौरव, धीरज पंडित, नीरज सिन्हा आरनि मौजूद रहतै ।

दोसरौ दिना के पहलौ सत्र मँ अंगिका केरौ वर्तमान दशा आरू दिशा प चर्चा-परिचर्चा करलौ जैतै । जेकरा मँ अंगिका साहित्य केरौ इतिहास आरू लेखन, आधुनिक अंगिका काव्य साहित्य, आधुनिक अंगिका नाट्य साहित्य, अंगिका कहानी साहित्य, अंगिका उपन्यास, अंगिका लोक साहित्य, अंगिका मुक्तक काव्य, अंगिका केरौ भूगोल, संविधान केरौ आठमौ अनुसूची मँ अंगिका जरूरी कैन्हें, अंगिका विकास मँ उत्तर अंग प्रदेश केरौ योगदान, मध्य अंग प्रदेश मँ अंगिका साहित्य, संथाल परगना मँ अंगिका साहित्य केरौ स्थिति आऱनि बिसयो प परिचर्चा होतै ।

अंगिका.कॉम के संस्थापक , अखिल भारतीय अंगिका साहित्य कला व मंच केरौ राष्ट्रीय उपाध्यक्ष आरू अखिल भारतीय अंग-अंगिका विकास मंच केरौ राष्ट्रीय महासचिव कुंदन अमिताभ नँ  दू दिनाँ तलक चलै वाला अंगिका महोत्सव - २०२० केरौ सफलता के शुभकामना व्यक्त करतें विश्वास जतैलै छै कि ई अंग आरू अंगिका लेली एगो ऐतिहासिक पहल साबित होतै आरू एकरो आवाज दिल्ली तलक पहुँचतै ।