उधाडीह गाँव मँ मनैलौ गेलै शौर्य चक्रधारी अंग गौरव शहीद निलेश कुमार नयन केरौ शहादतदिवस | New in Angika

उधाडीह गाँव मँ मनैलौ गेलै शौर्य चक्रधारी अंग गौरव शहीद निलेश कुमार नयन केरौ शहादत दिवस | Martyrdom Day of Shaurya Chakradhari Ang Gaurav Shaheed Nilesh Kumar Nayan celebrated in Udhadih village | News in Angika 

उधाडीह (सुलतानगंज), भागलपुर । ११ अक्तूबर, २०१९ । शौर्य चक्रधारी शहीद नीलेश नयन केरौ दोसरौ पुण्यतिथि हुनकौ गाँव उधाडीह मँ मनैलौ गेलै । जहाँ सैकड़ों गणमान्य आरू स्कूली छात्र- छात्रा द्वारा हुनकौ स्मारक पर पुष्पांजलि अर्पित करलौ गेलै ।

ई अवसर पर भीरखुर्द पंचायत के मुखिया सजीव कुमार सुमन, पूर्व मुखिया नकुल कुमार सिंह, पूर्व मुखिया अनिल कुमार सिंह, अनुरंजन सिंह, विनय कुमार, अवध सिंह, के अलावे कविवर हीरा प्रसाद हरेन्द्र, साथी सुरेश सूर्य, साथी इंद्रदेव, रामनारायण स्वामी, सुधीर कुमार प्रोग्रामर, नीलेश नयन के बाबू तरुण कुमार सिंह आरू हुनकौ समस्त परिजन जौरौ होय क बारी बारी सँ हुनकौ प्रतिमा प फूल व माला अर्पित करलकै । उच्च वि.केरौ बच्ची सिनी द्वारा भक्ति गीत के बाद काव्यांजलि अर्पित करलौ गेलौ।

ई अवसर पर उपस्थित जनों के बीच आम सहमति भेलै कि आगू के सहादत दिवस मुखिया जी के नेतृत्व में पंचायत स्तर पर मनैलौ जैतै । एकरा लेली एगो सञ्चालन समिति बनैलौ जैतै जे प्रखंड स्तर पर शहीद नीलेश के शहादत दिवस मनाबै आरू हुनको नाँव पर कोय भवन, सड़क या पुल बनाबै के प्रयास करतै।

ज्ञातव्य छै कि अंग देश गौरव वायु सेना केरऽ शहीद निलेश कुमार नयन क॑ शौर्य चक्र (मरणोपरांत) स॑ सम्मानित करलऽ गेलऽ छेलै । हुनका ई सम्मान नैसर्गिक  साहस के साथ वीरता केरऽ प्रदर्शन करी क॑ आतंकवादियऽ स॑ लड़ी करी क॑ देश केरऽ रक्षा लेली  बलिदान व सर्वस्व न्योछावर करै लेली प्रदान करलऽ गेलौ रहै ।

निलेश कुमार नयन भारतीय वायुसेना केरऽ गरूड़ कंमाडों दल म॑ कारपोरल के पद प॑ तैनात छेलै । ११ अक्टूबर २०१७ क॑ जम्मू-कश्मीर केरऽ बांदीपुरा क्षेत्र म॑ आतंकवादी सें मुठभेड़ म॑ हुनी शहीद होय गेलऽ छेलै ।