अंगिका भाषा क आठमौ अनुसूची मँ दर्ज कराबै लेली दिसम्बर मँ दिल्ली मँ होय वाला आन्‍दोलनक सफल बनाबै के करलौ गेलै आह्वान | News in Angika

अंगिका भाषा क आठमौ अनुसूची मँ दर्ज कराबै लेली दिसम्बर मँ दिल्ली मँ होय वाला आन्‍दोलन क सफल बनाबै के करलौ गेलै आह्वान | News in Angika Angika

भागलपुर :२९ सितंबर, २०१९ ।यहाँ आय आयोजित बैठक मँ अंगिका भाषा क आठमौ अनुसूची मँ दर्ज कराबै लेली दिसम्बर मँ दिल्ली मँ होय वाला आन्‍दोलन क सफल बनाबै के आह्वान करलो गेलै ।वरीय साहित्यकार डाॅ. अमरेन्द्र नँ कहलकै कि अंगिकाभाषा क जन-जन तलक पहुंचाबै लेली एकरौ लड़ाई लड़लौ जाय रहलौ छै, इ बार गूँज दिल्ली तलक पहुंचतै।वहीं गौतम सुमन नँ अंगिका क आठमौ अनुसूची मँ दर्ज कराबै क ल करी क दिसम्बर माह मँ घोषित राष्ट्रीय राजधानी क्षेत्र दिल्ली मँ होय वाला आन्‍दोलन केरौ तिथिवार कार्यक्रम के रूप रेखा प्रस्‍तुत करी क एकरा सफल बनाबै के अनुरोध करलकै।

अंगिका महोत्सव 2020 केरौ आयोजन क ल क रविवार क छोटी खंजरपुर केरौ महावीर चौक मँ गोष्ठी सह साहित्यिक पुस्तक लोकार्पण समारोह के आयोजन करलौ गेलै । ई अवसर पर चंद्रप्रकाश जगप्रिय द्वारा लिखित खरैता इतिहास और संस्‍कृति तथा प्रॆत-पचीसी साहित्यिक पुस्तक के लोकार्पण सेवानिवृत्त वाणिज्‍यकर संयुक्त आयुक्त कैलाश ठाकुर, वरीय साहित्यकार डॉ. अमरेंद्र, कवि गौतम सुमन, प्रीतम विश्वकर्मा, त्रिलोकीनाथ, सच्चिदानंद साह, डाॅ.जयंत जलद आरनि नँ संयुक्त रूप सँ करलकै ।

साहित्यिक पुस्तकौ पर विचार के अभिव्यक्ति के क्रम मँ साहित्यकारें सिनी नँ कहलकै कि खरैता इतिहास और संस्कृति मँ लेखक नँ अपनौ गांव के सामाजिक आर्थिक राजनीतिक व आध्यात्मिक पक्ष क बेवाक रूप सँ उभारलै छै । अध्यक्षता करी रहलौ कैलाश ठाकुर नँ कहलकै कि अंगिका मँ ई पहली पुस्तक छै, जेकरा मँ कथा सिनी के विवरण देलौ गेलौ छै ।

ई अवसर पर अंगिका महोत्सव 2020 क संपन्न करै के योजना पर विमर्श करलौ गेलै  कि दशहरा बाद अंगिका महोत्सव-2020 क सफल बनाबै लेली करलौ जाय रहलौ कामौ मँ तेजी लानलौ जैतै ।