दिल्ली सरकार केरौ स्वतंत्रता दिवस राष्ट्रीय कवि सम्मेलन मँ हिस्सा लेतै अंगिका के लोकप्रिय कवि सुधीर प्रोग्रामर । Angika's popular poet Sudhir Programmer will participate in the Independence Day National Kavi Sammelan of Delhi Government | News in Angika

नई दिल्ली, १० अगस्त, २०१९ । दिल्ली सरकार केरौ स्वतंत्रता दिवस राष्ट्रीय कवि सम्मेलन, जे कि कल इतवार क साँझै ५ बजे सँ आयोजित भ रहलौ छै, मँ हिस्सा लै लेली अंगिका भाषा के लोकप्रिय कवि श्री सुधीर प्रोग्रामर क आमंत्रित करलौ गेलौ छै ।

दिल्ली सरकार केरौ कला, संस्कृति व भाषा विभाग केरौ ई कार्यक्रम के आयोजन हर बरस के भाँति मैथिली-भोजपुरी अकादमी के बैनर तले होय रहलौ छै । जेकरा मँ भोजपुरी, मैथिली के अलावा अंगिका भाषा केरौ कवि सिनी क भी आमंत्रित करलौ जाय छै । दिल्ली सरकार बार-बार अंगिका भाषा-भाषी क भरोसा दिलाबै छै कि अंगिका के भी अकादमी के स्थापना करलौ जैतै ।

दिल्ली केरौ आम आदमी सरकार के प्रति आभार कि हुनी पिछला कुछ बरसौ सँ अंगिका भाषा के कवि सिनी क आपनौ कार्यक्रम मँ आमंत्रित करी क अंगिका भाषा भाषी जनता के मान-सम्मान के प्रति निष्ठा व्यक्त करै छै । हुनकौ ई निष्ठा आरू अधिक बलवती दिखतै जों ई कार्यक्रम अंगिका-मैथिली-भोजपुरी अकादमी के बैनर तले आयोजित होतियै । कार्यक्रम मँ भाग लै ल जाय रहलौ अंगिका भाषा के लोकप्रिय कवि श्री सुधीर प्रोग्रामर जी क बधाई व शुभकामना ।