सफलतापूर्वक लाँच भेलै चन्द्रयान-२, भारत केरौ चाँद तलक लंबा छलाँग | News in Angika

सफलतापूर्वक लाँच भेलै चन्द्रयान-२, भारत केरौ चाँद तलक लंबा छलाँग ।

बेंगलुरू, २२ जुलाई, २०१९ । अनगिनत सपना आरू उम्मीद ल क भारत केरौ मिशन चन्द्रयान-२ सोमवार क चाँद दन्नें रवाना भ गेलै ।

इसरो नँ  सतीश धवन स्पेस सेन्टर श्रीहरिकोटा सँ आय  चन्द्रयान-२ क  लॉंच करी देलकै ।

बाहुबली नाम सँ पुकारलौ जायवाला सबसें ताकतवर रॉकेट जीएसएलवी-मार्क-III-एम १ नँ प्रक्षेपण के करीब १६ मिनटो के बाद यान क धरती केरौ कक्षा मँ सफलता पूर्वक स्थापित करी देलकै ।

धरती केरौ कक्षा मँ सफलता पूर्वक स्थापित होला के बाद चन्द्रयान-२ मिशन के पहला चरण पूरा भ गेलै । अबय अगला डेढ़ महीना मँ ई मिशन क १५ महत्वपूर्ण चरणौ सँ गुजरै ल पड़तै । ओकरो बाद वू दिन ऐतै जबै चाँद केरौ दक्षिणी ध्रुव के लगीच म सुरक्षित लैंडिग सुनिश्चित करै लेली अंतिम १५  मिनटों मँ चुनौतीपूर्ण स्थिति सँ गुजरै ल पड़तै ।

चन्द्रयान-२ सोमवार २२ जुलाय क आन्ध्र प्रदेश केरौ श्रीहरिकोटा सँ दुपहर बाद २ बजी क ४३ मिनटो पर लॉंच भेलै । १५ जुलाय क तकनीकी खामी सँ टलला के बाद चन्द्रयान-२ क अबय २२ जुलाय क लॉंच करै के तैयारी करलौ गेलौ रहै । बाहुबली के नाम सँ जानलो जाय वाला रॉकेट जीएसएलवी-एमके३ मँ जे खामी छेलै ओकरा स सुधारी देलौ गेलै  ।

इसरो नँ ट्वीट करी क २२ तारीख के लॉन्चिंग केरौ जानकारी देलै छेलै ।