भारत सरकार केरौ त्रिभाषा फार्मूला के तहत अंगदेश केरौ सब्भे रेलवे स्टेशन सँ अंगिका भाषामँ सूचना निर्गत व उदघोषित कराबै लेली ज्ञापन | News in Angika

भागलपुर । २७ जून, २०१९ । अखिल भारतीय अंगिका साहित्य कला मंच केरौ अंगिका भाषा साहित्यकार सिनी केरौ शिष्टमंडल नँ भागलपुरौ के स्टेशन प्रबंधक समर सिंह क एगो ज्ञापन सौंपी क भारत सरकार केरौ त्रिभाषा फार्मूला के तहत अंगदेश केरौ सब्भे रेलवे स्टेशन सँ अंगिका भाषा मँ यात्री लेली सूचना व उदघोषणा कराबै के माँग करलै छै ।

अंगिका साहित्दयकार सिनी के दस्तखत के साथ सौंपलौ गेलौ ज्ञापन मँ कहलौ गेलौ छै कि हिंदी, अंग्रेजी के साथ-साथ अंगिका भाषा मँ भी यात्री लेली सूचना निर्गत करलौ व उद्घोषणा के प्रसारण करलौ जाय ।

स्टेशन प्रबंधक नँ आपनौ तरफौ सँ ई संबंध मँ भरपूर प्रयास करै के आश्वासन देलकै ।

करोड़ों लोगौ के भाषा अंगिका क जनसूचना  के भाषा बनैला सँ लोगो क खूब्बे सुभित्ता होतै । साथें साथ भाषा के संरक्षण भी होतै । 

ज्ञापन मँ कहलौ गेलौ छै कि पाँच करोड़ सँ भी जादै लोगो के भाषा क जनसूचना के भाषा बनैला सँ लोगो क अखनी अंग्रेजी मँ देलो जाय रहलौ सूचना सँ होय वाला परेशानी सँ निजात मिलतै । कहलौ गेलौ छै कि देश केरौ कईएक प्रदेशो मँ स्थानीय लोकभाषा मँ सूचना के प्रसारण के व्यवस्था छै ।

ज्ञापन सौंपै वाला शिष्टमंडल मँ शामिल छेलै, सर्वश्री हीरा प्रसाद हरेंद्र, पारस कुंज, महेंद्र प्रसाद निशाकर,  सुधीर कुमार प्रोग्रामर,  धीरज पंडित, त्रिलोकीनाथ दिवाकर, सच्चिदानंद किरण आरनि शामिल छेलै ।