खानपुर पंचायत मँ पानी के किल्लत क ल करी क बराती-सराती मँ माथौ फुटौअल, एक दर्जनघायल | News in Angika

खानपुर पंचायत मँ पानी के किल्लत क ल करी क बराती-सराती मँ माथौ फुटौअल, एक दर्जन घायल ।

खानपुर । २० मई,२०१९ । खबर छै कि खानपुर पंचायत केरौ एगो गाँव इंगलिश खानपुर मँ पानी क ल करी क बराती-सराती मँ माथौ फुटौअल के चलतें आधा दर्जन लोगौ के माथौ भाँगी गेलै आरू कुल एक दर्जन लोग घायल होय गेलौ छै ।

जेना - जेना गरमी बढ़ी रहलौ छै, पानी लेली मारा-मारी के घटना अबै रोजमर्रा के बात बनलौ जाय रहलौ छै !

खानपुर पंचायत मँ अखनिये सँ पानी के घोर किल्लत शुरू भ गेलौ छै ।हालत ई रकम गंभीर छै कि परसों बराती-सराती मँ पुरजोर उठा-पटक होय गेलै आरू एक दर्जन लोग घायल भ गेलै ।

हालत बिगड़ला प पुलिस क सूचना देलौ गेलै । पुलिस आबै के भनक लगला प बराती के लोग आपनौ-आपनौ गाड़ी सँ भागै लगलै । यहाँ तलक कि दुल्हा के घर वाला भी भागी गेलै । दुल्हा भी गाड़ी प सवार होय चुकलौ छेलै । गाँव वालां सब नँ दुल्हा के गाड़ी रोकलकै आरू आनन-फानन मँ शादी करैलकै ।

पूरे पंचायत मँ करीब २५० सरकारी चापाकल छै जेकरा मँ सब फेल होय चुकलौ छै । आन दिना त ७०-८०फीट प पानी मिलै छै लेकिन गरमी शुरू होथैं पानी ३५० फीट नीचें चल्लौ जाय छै ।

एन्हौ मुसीबत के समय मँ पानी लेली लोग फेरू सँ कुईयाँ दन्नें रूख करी रहलौ छै ।

मुख्यमंत्री केरौ सात निश्चय योजना के तहत जल-नल के काम एक सँ तीन वार्ड मँ करैलौ गेलौ छै, लेकिन एकरा मँ सँ कोय भी बोरिंग चालू नै हुअय पारलौ छै ।