आरोही जी केरौ छुट्टी, सत्येन्द्र कुमार बनलै बिहार अंगिका अकादमी के कार्यकारी अध्यक्ष | News in Angika

आरोही जी केरौ छुट्टी, सत्येन्द्र कुमार बनलै बिहार अंगिका अकादमी के कार्यकारी अध्यक्ष ।

पटना । १८ मई,२०१९ । बिहार सरकार नँ श्री सत्येन्द्र कुमार क बिहार अंगिका अकादमी केरौ कार्यकारी अध्यक्ष सह निदेशक के रूप मँ प्राधिकृत करलै छै ।

श्री सत्येन्द्र कुमार वर्तमान मँ बिहार अंगिका अकादमी केरौ कार्यकारी निदेशक सह सचिव के रूप मँ कार्यरत रहै। एकरौ साथ-साथ हुनी बिहार राष्ट्रभाषा परिषद केरौ प्रभारी अध्यक्ष सह निदेशक के रूप मँ कार्यरत छै ।

बिहार केरौ राज्यपाल के आदेश सँ सरकार केरौ उप सचिव श्री अरशद फिरोज के दसखत सँ गत १५ मई,२०१९ क जारी बिहार शिक्षा विभाग केरौ अधिसूचना मँ सत्येन्द्र कुमार क बिहार अंगिका अकादमी केरौ कार्यकारी अध्यक्ष सह निदेशक के रूप मँ प्राधिकृत करै के निर्देश देलौ गेलौ छै ।

अधिसूचना मँ कहलौ गेलौ छै कि अंगिका अकादमी के अध्यक्ष पद प नियमित नियुक्ति हुऐ तलक आरू अगला आदेश जारी हुऐ तलक ई कार्यकारी व्यवस्था जारी रहतै ।

अंगिका डॉट क़ॉम के संस्थापक कुंदन अमिताभ नँ डॉ.लखन लाल सिंह आरोही क बिहार अंगिका अकादमी केरौ अध्यक्ष  पद सँ हटाबै के स्वागत करतें हुऐ आशा व्यक्त करलै छै कि कोनो विद्वान अंगिका साहित्यकार / आंदोलनधर्मी क नियमित अध्यक्ष के रूप मँ नियुक्त करलौ जैतै ।

ज्ञातव्य छै कि अंगिका डॉट क़ॉम के संस्थापक व अखिल भारतीय अंग-अंगिका विकास मंच केरौ संस्थापक महासचिव कुंदन अमिताभ नँ गत १४ फरवरी, २०१९ क बिहार केरौ मुख्यमंत्री सहित बिहार केरौ राज्यपाल, बिहार सरकार केरौ शिक्षा विभाग, बिहार केरौ अंग क्षेत्र केरौ सब विधायक आदि क पत्र लिखी क आरू टवीटर के माध्यम सँ संदेश व पत्र भेजी क डॉ.लखन लाल सिंह आरोही क बिहार अंगिका अकादमी केरौ अध्यक्ष पद सँ हटाबै के माँग करनै छेलै ।

@NitishKumar माननीय मुख्यमंत्री महोदय । संलग्न पत्र के आलोक में आपसे नम्र निवेदन है कि आरोही जी को अंगिका अकादमी के अध्यक्ष पद से पदच्युत कर किसी अंगिका साहित्यकार को इस पद पर नियुक्त किया जाय । आरोही जी अंगिका साहित्यकारों को अपमानित करने में लगे हुए हैं । वे अंगिका विरोधी हैं । सादर । pic.twitter.com/GbQO0xKI8E

— कुंदन अमिताभ (@kundanamitabh) February 14, 2019

गत फरवरी माह मँ आयोजित अंगिका महोत्सव २०१९ केरौ अंतिम दिन सर्वसम्मति सँ आठ महत्वपूर्ण प्रस्ताव पारित करी क अंगिका विकास लेली आगू के रणनीति तय करलौ गेलौ रहै जेकरा मँ भागलपुर विवि केरौ डीएसडब्ल्यू डॉ. योगेंद्र नँ प्रस्ताव पढ़लै रहै जेकरा प्रशाल मँ उपस्थित अंगिका साहित्यकार, कलाकार, अंगिका प्रेमी सिनी नँ सर्वसम्मति सँ पास करलै रहै। सर्वसम्मति सँ पारित करलौ गेलौ आठ महत्वपूर्ण प्रस्ताव मँ एगो प्रस्ताव आरोही जी क बिहार अंगिका अकादमी केरौ अध्यक्ष पद सँ हटाबै के भी रहै । 

प्रस्ताव मँ कहलौ गेलौ रहै कि अंगिका वासियौ के भावना क ध्यान मँ रखी क बिहार मँ अंगिका अकादमी के स्थापना करतें हुऐ बिहार सरकार नँ एगो विद्वान क अंगिका अकादमी के अध्यक्ष पद प प्रतिष्ठित करलकै । ई महोत्सव अत्यंत दुख आरू क्षोभ के साथ ई अनुभव करै छै कि अकादमी के गठन सँ ल करी क आय तलक अंगिका अकादमी तरफौ सें अंगिका के विकास, संवर्धन आरू उन्नयन लेली कोय उल्लेखनीय कदम नै उठैलौ गेलौ छै । ई लेली सँ ई महोत्सव राज्य सरकार सें अनुरोध करै छै कि बिहार अंगिका अकादमी केरौ अध्यक्ष पद प कोनो अंगिका सेव़ी विद्वान क प्रतिष्ठित करअ ।