लोकशाही क हम्में कलै-कलै तानाशाही मँ बदलतें देखलियै, वन मैन शो आरू टू मेन आर्मी बनी करही गेलौ छै बीजेपी - शत्रुघ्न सिन्हा | News in Angika

लोकशाही क हम्में कलै-कलै तानाशाही मँ बदलतें देखलियै, वन मैन शो आरू टू मेन आर्मी बनी क रही गेलौ छै बीजेपी - शत्रुघ्न सिन्हा ।

नई दिल्ली / पटना । 6 अप्रैल, 2019 । लोकसभा चुनाव सँ ठीक पहलै बीजेपी के कद्दावर बागी नेता नँ कांग्रेस के हाथ थामी लेलै छै । पटना साहिब सँ सांसद शत्रुघ्न सिन्हा आय दिल्ली मँ कांग्रेस मँ शामिल होलै आरू बीजेपी के स्थापना दिवस के दिन ही हुनी भाजपा के साथ छोड़ी देलकै । शत्रुघ्न सिन्हा क बीजेपी नँ टिकट नै देलै रहै । शत्रुघ्न सिन्हा नँ दिल्ली मँ बिहार काँग्रेस के प्रभारी शक्ति सिंह गोहिल आरू राष्ट्रीय प्रवक्ता रणदीप सुरजेवाला के मौजूदगी मँ कांग्रेस के सदस्यता ग्रहण करलकै ।

ई दौरान प्रेस कॉन्फ्रेंस करतें वक्त शत्रुघ्न सिन्हा नँ नयौ परिवार आरू साथियौ के धन्यवाद करलकै आरू कहलकै कि हम्में भारी मनौ सँ पार्टी छोड़ी रहलौ छियै । साथ ही हुनी भाजपा क स्थापना दिवस के बधाई भी देलकै । ई दौरान शत्रुघ्न सिन्हा नँ बीजेपी पर आरोप लगैतें कहलकै कि पार्टी नँ भाजपा के वरिष्ठ नेता सब के अपमान करलै छै । बीजेपी मँ लोगौ के कद्र नै होय छै । बीजेपी मँ लोकशाही कलै-कलै तानाशाही मँ बदलतें गेलै । पटना साहिब सँ बीजेपी नँ केंद्रीय मंत्री रविशंकर प्रसाद क मैदान मँ उतारलै छै ।

शत्रुघ्न सिन्हा नँ कहलकै कि कांग्रेस पार्टी अबै हमरौ परिवार छेकै आरू अबै हम्में ई परिवार के हिस्सा छेकियै । कांग्रेस पार्टी नँ आजादी के लड़ाय मँ योगदान देलै छै । भाजपा छोड़ी कांग्रेस मँ शामिल होलौ शत्रुघ्न सिन्हा नँ भारतीय जनता पार्टी पर आरोप लगैतें कहलकै कि बीजेपी 'वन मैन शो' आरू 'टू मैन आर्मी' बनी गेलौ छै ।

शत्रुघ्न सिन्हा के काँग्रेस मँ शामिल होला प के.सी. वेनुगोपाल नँ कहलकै कि आय कांग्रेस मँ सबसें बेहतर पॉलिटिशियन शामिल होय रहलौ छै । हुनी कहलकै कि एगो अच्छा नेता गलत पार्टी मँ रहै, जे अबै सही पार्टी मँ ऐलौ छै ।

पटना साहिब सीट पर 1946249 वोटर छै जेकरा मँ 54.07 प्रतिशत पुरुष आरू 45.93 प्रतिशत महिला वोटर छै । साल 2014 के लोकसभा चुनाव मँ शत्रुघ्न सिन्हा क 485905 वोट मिललौ रहै आरू दोसरौ नंबर पर कांग्रेस छेलै जे कि आरजेडी के साथ मिली क चुनाव लड़लौ रहै आरू ओकरा 220100 वोट मिललौ रहै । जेडीयू तीसरा, आम आदमी पार्टी चौथा आरू  समाजवादी पार्टी पांचमा नंबर पर रहलौ छेलै । हुनका खिलाफ बीजेपी केरौ श्री रविशंकर प्रसाद लड़ी रहलौ छै ।

बीजेपी सँ बग़ावत करै के बारे मँ सिन्हां कहै छेलै कि अगर सच बोलना बग़ावत छै त वू बाग़ी छेकै । सिन्हां नँ कहनै छेलै कि वू केकरो स्तुतिगान नै करतै आरू बीजेपी क आईना दिखाबै के काम करतें रहतै, कैन्हेंकि देश पार्टी से बड़ौ छै।

बिहार मँ 40 लोकसभा सीट प 7 चरणौ मँ होतै  मतदान
11 अप्रैल: जमुई औरंगाबाद, गया, नवादा,
18 अप्रैल: बांका, किशनगंज, कटिहार, पूर्णिया, भागलपुर
23 अप्रैल: खगड़िया, झंझारपुर, सुपौल, अररिया, मधेपुरा,
29 अप्रैल: दरभंगा, उजियारपुर, समस्तीपुर, बेगूसराय, मुंगेर
6 मई: मधुबनी, मुजफ्फरपुर, सारन, हाजीपुर, सीतामढ़ी,
12 मई: पूर्वी चंपारण, पश्चिमी चंपारण, , शिवहर, वैशाली, गोपालगंज, सिवान, महाराजगंज, वाल्मीकिनगर
19 मई: नालंदा, पटना साहिब, पाटलिपुत्र, आरा, बक्सर, सासाराम, काराकट, जहानाबाद