बिहार मँ राजग (NDA) के उम्मीदवारौ के घोषणा 24 मार्च तलक - जदयू प्रदेश अध्यक्ष | News in Angika

पटना ।२१ मार्च, २०१९ । जदयू (JDU) के बिहार इकाई के अध्यक्ष वशिष्ठ नारायण सिंह नँ गुरूवार क कहलकै कि राजग (NDA) के उम्मीदवारौ के घोषणा 24 मार्च के पहलें करी देलौ जैतै । पत्रकारौ सें बातचीत के दौरान हुनी कहलकै कि अबै नामांकन के प्रक्रिया शुरू होय गेलौ छै आरू  आगामी 24 मार्च सें पहलें निश्चित रूप सें हम्में सिनी उम्मीदवारौ के घोषणा करी देबै ।

बिहार मँ राजग के तीनों घटक, भाजपा, जदयू आरू लोजपा नँ राज्य के सब्भे 40 लोकसभा सीटौ मँ सें कोन घटक दल कहां सँ अपनौ उम्मीदवार उतारतै, के गत 17 मार्च क घोषणा करी चुकलौ छै ।  बिहार भाजपा प्रमुख नित्यानंद राय, जदयू के प्रदेश अध्यक्ष बशिष्ठ नारायण सिंह आरू लोजपा के प्रदेश अध्यक्ष पशुपति कुमार पारस नँ जदयू कार्यालय मँ आयोजित एगो संयुक्त संवाददाता सम्मेलन मँ ई घोषणा करनै रहै ।

राजग के तीन दलौ के बीच पहनै ही एगो समझौता होय चुकलौ छै, जेकरौ अनुसार भाजपा आरू जदयू 17-17 सीटौ प जबकि लोजपा छह सीटौ प चुनाव लड़तै ।

भाजपा जोन 17 सीटौ पर चुनाव लड़तै ओकरा मँ पश्चिम चंपारण (बेतिया), पुर्वी चंपारण (मोतिहारी), मुजफ्फरपुर, सारण, महराजगंज, शिवहर, मधुबनी , दरभंगा, उजियारपुर, बेगूसराय, पटना साहिब, पाटलिपुत्र, आरा, बक्सर, सासाराम, औरंगाबाद आरू अररिया शामिल छै । जदयू द्वारा लड़लौ जाय वाला लोकसभा सीटौ मँ वाल्मीकिनगर, सीवान, गोपालगंज, जहानाबाद, गया, काराकट, मधेपुरा, सुपौल, झंझारपुर, सीतामढ़ी, पूर्णिया, किशनगंज, बांका, भागलपुर, मुंगेर, नालंदा आरू कटिहार शामिल छै । केंद्रीय मंत्री रामविलास पासवान के पार्टी लोजपा जोन छह लोकसभा सीटौ पर चुनाव लड़तै ओकरा मँ हाजीपुर, समस्तीपुर, जमुई, नवादा, खगड़िया आरू वैशाली शामिल छै ।