शत्रुघ्न सिन्हा पटना साहिब सीट सँ ही लड़तै चुनाव, काँग्रेस के टिकट पर ! | News in Angika

पटना । अनुमान के अनुसार शत्रुघ्न सिन्हा पटना साहिब सीट सँ ही लड़तै लोकसभा चुनाव! हालाँकि इ बात के पूरा संभावना छै कि हुनी इ दफा भारतीय जनता पार्टी के बदले काँग्रेस के उम्मीदवार के रूप मँ खड़ा हुऐ।

अभिनेता सँ नेता बनलौ शत्रुघ्न सिन्हा नँ बीजेपी आरू पीएम मोदी के खिलाफ अपनौ हमला तेज करी देलै छै । सूत्रौ के मोताबिक शत्रुघ्न सिन्हा क इ बार बीजेपी तरफौ सँ टिकट मिलै के उम्मीद नै छै । ऐसनौ खबर छै कि शत्रुघ्न सिन्हा के जग्घौ पर केंद्रीय मंत्री रविशंकर प्रसाद पटना साहिब सँ चुनाव लड़ै सकै छै । शत्रुघ्न सिन्हा नँ ट्वीट करलै छै, 'सरजी, आपनै के अनुसार २० सँ अधिक पार्टी 'महामिलावत' छै आरू ४० सँ अधिक पार्टी आपनै के समर्थन करी रहलौ छै! लोग एकरा की कहतै 'महागिरावट'? अगला ट्वीट में हुनी लिखै छै कि 'जनता सँ करलौ गेलौ वादा अभी भी पूरा होना बाकी छै ।'

हालै मँ शत्रुघ्न सिन्हा नँ शायराना अंदाज में एक ट्वीट करी क इशारा-इशारा में पार्टी छोड़ै के बात कहनै छेलै । हुनी शायराना अंदाज में ट्वीट करी क कहलकै कि मोहब्बत करै वाला कम नै होतै, (शायद) तोरौ महफिल में लेकिन हम्मैं नै होभौं ।