मोदी राष्ट्रवाद के आढ़ मँ आपनौ नाकामी छिपाय क सियासत करी रहलौ छै - प्रियंका | News in Angika

गाँधीनगर ।१२ मार्च, २०१९ । लोकसभा केरौ घोषणा के साथ ही काँग्रेस नँ आपनौ चुनाव अभियान शुरू करी देलै छै । चुनाव अभियान के शुरूआत प्रधानमंत्री नरेंद्र मोदी केरौ राज्य गुजरात सँ करलौ गेलौ छै ।

काँग्रेस केरौ महासचिव पद सँभालला के बाद पहलौ दफा भाषण द रहलौ प्रियंका गाँधी नँ कहलकै कि जागरूकता ही सबसँ बड़ौ देशभक्ति छेकै। देश मँ नफरत बढ़ी रहलौ छै।

प्रियंका गाँधी नँ कहलकै कि प्रधानमंत्री मोदी राष्ट्रवाद केरौ आढ़ मँ आपनौ नाकामी छिपाय क सियासत करी रहलौ छै ।

प्रियंका केरौ  काँग्रेस के महासचिव के रूपौ मँ नियुक्ति के बाद परिवारवाद के मुद्दा प घिरलौ काँग्रेस के जबाब मँ  प्रियंका गाँधी नँ कहलकै कि काँग्रेस प परिवारवाद के आरोप लगाय क मोदी सरकार असल मुद्दा सँ जनता के धियान भटकाय रहलौ छै । सरकार नँ हर साल दू करोड़ रोजगार दै के वादा करने रहै, वू कन्नें गेलै ? जुआन, जनानी आरू किसानौ लेली की करलौ जाना चाहिय्यौ, वहै असल मुद्दा छेकै ।

प्रधानमंत्री मोदी केरौ वक्तव्य, गाँधी जी काँग्रेस क खतम करै ल चाहै छेलै आरू पटेल भी हुनका सँ सहमत छेलै के जबाबौ मँ प्रियंका नँ कहलकै कि  गाँधी जी केरौ ई देश मँ संस्था सिनी क मिटैलौ जाय रहलौ छै ।

प्रियंका गाँधी नँ कहलकै कि ई जवानौ के देश छेकै । जनता सँ अपील करतें कहलकै कि आपनै के वोट आपनै के हथियार छेकै , ऐसनौ हथियार जे आपनै क मजबूती देतै । हुनी कहलकै कि जागरूकता ही सबसँ बड़ौ देशभक्ति छेकै । काँग्रेस केरौ महासचिव,एयर-स्ट्राइक के बाद सरकार केरौ वक्तव्य कि हुनी आतंकी सिनी क ओकरौ घर मँ घुसी क मारी गिरैलकै, के जबाब द रहलौ छेलै ।

Source :

१. https://www.thehindu.com/news/national/priyanka-gandhi-vadra-chooses-gujarat-to-deliver-first-speech-as-general-secretary/article26510692.ece

२. https://www.indiatoday.in/elections/video/watch-in-her-first-political-speech-priyanka-gandhi-hits-out-at-pm-modi-1476238-2019-03-12

३. दैनिक भास्कर