कश्मीर म सीआरपीएफ के काफिला प फिदायीन हमला - ४२ जवान शहीद, शहीदौ में अंगदेश केरौ रतन कुमार ठाकुर भी | News in Angika

श्रीनगर । कश्मीर म अभी तलक के सबसें बड़ौ आतंकी हमला होलौ छै ।  जम्मू कश्मीर केरौ पुलवामा जिला म गुरूवार १४ फरवरी क जैश-ए-मोहम्मद केरौ आतंकियें, सीआरपीएफ जवानौ के एगो काफिला प फिदायीन हमला करी देलकै । जेकरा में ४२ जवान शहीद भ गेलै ।शहीदौ में अंगदेश केरौ सपूत रतन कुमार ठाकुर भी शामिल छै । जबकि २० सें जादे घायल होलौ छै । हताहत के संख्या बढ़ै के आशंका छै । दू आरपीओ के शहीद होय के भी सूचना छै ।

पुलवामा म फिदायिन हमला के बाद बचाव कार्य

ई हमला तबे होलै जबे जबानौ के ७८ गाड़ी केरौ काफिला, जेकरा में २५४७ जवान सवार छेलै, जम्मू सें श्रीनगर दन्नें जाय रहलौ छेलै । हमला केरौ जिम्मेवारी आतंकी संगठन जैश-ए-मोहम्मद न लेनै छै । ई संगठन न फिदायीन हमलावर, आदिल अहमद केरौ तस्वीर भी जारी करनै छै ।

 पुलवामा म आत्मघाती हमला

शहीदौ में बिहार सें दू आरू झारखंड के एक जवान शामिल छै । बिहार केरौ अंगदेश अन्तर्गत भागलपुर जिला के कहलगाँव लगाँकरौ अमडंडा थाना के रतनपुर गाँव केरौ रतन कुमार ठाकुर भी शहीद होलौ छै ।