अंगिका भाषा आरू अंग संस्कृति केरऽ संरक्षण व संवर्द्धन के संकल्प सथें संपन्न भेलै अंगिकामहोत्सव - २०१९ | News in Angika

भागलपुर ।अंगिका भाषा आरू अंग संस्कृति केरऽ संरक्षण व संवर्द्धन के संकल्प लेत॑ हुअ॑ दू दिवसीय अंगिका महोत्सव - २०१९ संपन्न भ॑ गेलै ।

 जेकरा म॑ अंगिका क॑ अष्टम अनुसूची म॑ शामिल कराबै लेली कोर कमिटी केरऽ गठन केरऽ महत्वपूर्ण प्रस्ताव पास करलऽ गेलै ।

साथ ही ई प्रस्ताव भी पास करलऽ गेलै कि हर अंगिका भाषी जिला केरऽ डी.एम. क॑ प्रतिवेदन द॑ क॑ माँग करलऽ जैतै कि जिला केरऽ राजकीय गजट म॑ जिला केरऽ भाषा के नाम के रूप म॑ अंगिका के नाम दर्ज करलऽ जाय़ ।

बितलऽ २  फरवरी  आरू  ३ फरवरी क॑ आयोजित होलऽ अंगिका महोत्सव, चार अलग-अलग सत्र म॑ संपन्न होलै ।जेकरा म॑ अंगिका केरऽ विकास संबंधी अलग-अलग विषयऽ प॑ परिचर्चा के अलावा, अंगिका लोक नृत्य - झिझिया, मल्हा, अंगिका लघु फिल्म - छुटकारा, रूपक - बिहुला बिषहरी, कवि सम्मेलन, लोकनाट्य - डोमकच्छ केरऽ प्रदर्शन करलऽ गेलै ।

जोन प्रमुख विषयऽ प॑ परिचर्चा होलै ओकरा म॑ शामिल छै- अंगिका आरू मीडिया, अंगिका केरऽ अतीत व वर्तमान, अंगिका क॑ संविधान केरऽ अष्टम अनुसूची म॑ शामिल कराना, अंगिका भाषा केरऽ बाधा व ओकरऽ समृद्धि केरऽ योजना ।