अटल युग केरऽ अंत, भारत-रत्न पूर्व प्रधानमंत्री अटल बिहारी वाजपेयी केरऽ निधन | News in Angika

नई दिल्ली । भारत केरऽ पूर्व प्रधानमंत्री अटल बिहारी वाजपेयी केरऽ आय ९४ वर्ष केरऽ आयु में निधन होय गेलै । हुनी आय गुरुवार क॑ साँझ क॑ ५ बजी क॑ ५ मिनट प॑ अंतिम साँस लेलकै ।

वाजपेयी केरऽ निधन पर सात दिन केरऽ राष्ट्रीय शोक घोषित करलऽ गेलऽ छै । १६ सें २२ अगस्त तलक राष्ट्रीय शोक के घोषणा करलऽ गेलऽ छै । ई दौरान देश केरऽ राष्ट्रीय ध्वज - तिरंगा झुकलऽ रहतै । अटल बिहारी केरऽ अंतिम संस्कार शुक्रवार क॑ पूरा राजकीय सम्मान के साथ ५ बजे करलऽ जैतै । एकरऽ पहले पूर्व प्रधानमंत्री केरऽ पार्थिव शरीर हुनकऽ निवास स्थान पर लोगऽ सिनी के दर्शनार्थ रखलऽ जैतै ।

पूर्व प्रधानमंत्री क॑ ११ जून क॑ एम्स म॑ भर्ती करलऽ गेलऽ छेलै । जहां पिछला दू दिन सें हुनकऽ तबियत जादा बिगड़ी रहलऽ छेलै । गुरुवार क॑ हुनी शाम ५ बजी क॑ ५ मिनट पर अंतिम सांस लेलकै ।

पूर्व प्रधानमंत्री भारत-रत्न अटल बिहारी वाजपेयी केरऽ निधन पर आय राष्ट्रपति, उपराष्ट्रपति, प्रधानमंत्री सहित केंद्र व राज्य सरकार के कईएक मंत्रियऽ के साथ-साथ देश-विदेश केरऽ बड़ऽ-बड़ऽ हस्ती सब न॑ दुख जतैल॑ छै आरू कहल॑ छै कि हुनी हमेशा लोगऽ के दिलऽ म॑ बसलऽ रहतै ।

विशेष बैठक बुलाय क॑ शोक संदेश पारित करलऽ गेलै जेकरा म॑ अटल बिहारी वाजपेयी क॑ महान देशभक्त, दूरदर्शी नेता आरू स्वतंत्रता सेनानी बतैलऽ गेलै ।