देवघर आरू अंग प्रदेश के जनता क॑ नया तोहफ़ा - देवघर स॑ अगरतला लेली चलतै सुपरफास्ट ट्रेन | News in Angika

देवघर । केंद्र सरकार तरफऽ स॑ देवघर आरू अंग प्रदेश के जनता क॑ एगो नया तोहफ़ा मिललऽ छै । जल्दिये देवघर आरू अगरतला रेलवे स्टेशनऽ के बीच सुपरफास्ट ट्रेन चलैलऽ जैतै । गोड्डा केरऽ माननीय सांसद श्री निशिकांत दूबे केरऽ अनुसार हुनकऽ पहल प॑ रेलवे बोर्ड द्वारा एकरऽ स्वीकृति मिली गेलऽ छै ।

देवघर स॑ अगरतला लेली वीकली सुपरफास्ट ट्रेन अप्रैल के अंतिम सप्ताह या मई माह म॑ चालू होय जैतै । झारखंड केरऽ देवघर स॑ चली क॑ ई ट्रेन त्रिपुरा केरऽ राजधानी अगरतल्ला तलक केरऽ अपनऽ सफर मार्ग म॑ किउल, जमालपुर, भागलपुर,साहिबगंज, फरक्का, न्यू जलपाइगुड़ी, कूच बिहार, गोहाटी,लामदिंग, सिलचर रेलवे स्टेशन होतें हुअ॑ गुजरतै ।

श्री निशिकांत दूबे न॑ प्रधानमंत्री, मुख्यमंत्री व रेल मंत्री के प्रति आभार प्रकट करल॑ छै । हुनकऽ अनुसार ई ट्रेन के चालू होला स॑ पारस्परिक पर्यटन आरू व्यापार केरऽ क्षेत्र में प्रगति के संभावना छै ।