मुंगेर विश्वविद्यालय केरऽ नाँव अंग विश्वविद्यालय राखै के करलऽ गेलै माँग | News in Angika

सुलतानगंज । मुंगेर विश्वविद्यालय केरऽ नाँव अंग विश्वविद्यालय राखै के माँग करलऽ गेलऽ छै । अखिल भारतीय अंगिका साहित्य कला मंच न॑ ई माँग बिहार केरऽ मुख्यमंत्री श्री नीतीश कुमार क॑ चिट्ठी लिखी क॑ करल॑ छै ।

अखिल भारतीय अंगिका साहित्य कला मंच केरऽ प्रदेश महासचिव श्री सुधीर कुमार प्रोग्रामर न॑  पत्र लिखी क॑  बिहार केरऽ मुख्यमंत्री श्री नीतीश कुमार सें ई माँग करल॑ छै  । हुनी पत्र म॑ लिखल॑ छै कि चूँकि मुंगेर केरऽ कर्णगढ़ म॑ सूर्योदय के समय नित प्रति अंगराज कर्ण गरीबऽ के बीच सोना दान करबऽ करै छेलै, ई लेली अंगजनपद केरऽ करोड़ों लोगऽ के इच्छा छै कि नवसृजित मुंगेर विश्वविद्यालय केरऽ नाँवकरण अंग विश्वविद्यालय करलऽ जाय ।

पत्र म॑ आग्रह करलऽ गेलऽ छै कि मुंगेर केरऽ ऐतिहासिकता आरू पौराणिकता क॑ धियान म॑ रखतें हुअ॑ अंग विश्वविद्यालय नामकरण करी क॑ अंग महाजनपद केरऽ जनता के भावना के सम्मान करलऽ जाय ।