अंगिका भाषा क॑ संवैधानिक मान्यता दिलाबै लेली "अंगिका भाषा मान्यता आंदोलन" अंतर्गततेज करलऽ जैतै "अंगिका जनजागरण अभियान" गतिविधि | News in Angika
नई दिल्ली । अंगिका भाषा क॑ संवैधानिक मान्यता दिलाबै लेली दिल्ली स्थित "अखिल भारतीय अंगिका पत्रकार एवं लेखक संघ" द्वारा चलैलऽ जाय रहलऽ "अंगिका जनजागरण अभियान" केरऽ गतिविधि क॑ तेज करलऽ जैतै। संघ ई अभियान "अंगिका भाषा मान्यता आंदोलन" (Angika Language Recognition Movement - ALRM) के तहत चलैतै ।
अंगिका.कॉम स॑ मंगलवार क॑ बातचीत करतें अखिल भारतीय अंगिका पत्रकार एवं लेखक संघ केरऽ राष्ट्रीय संयोजक, डॉ. शशिधर मेहता न॑ बतैलकै कि संघ करोड़ों लोगऽ के मातृभाषा, अंगिका क॑ भारतीय संविधान केरऽ अष्टम अनुसूची म॑ शामिल कराबै के संवैधानिक मान्यता दिलाबै हेतु प्रतिबद्ध छै जेकरा लेली दिल्ली सहित पूरे देश म॑ गहन "अंगिका जनजागरण अभियान" केरऽ गतिविधि क॑ तेज करलऽ जैतै ।
अंगिका जागरण अभियान के तहत गाँव-गाँव जाय क॑ लोगऽ स॑ बातचीत के माध्यम स॑ अंगिका के बारे जागरूकता फैलैलऽ जैतै । ग्राम व नुक्कड़ सभा, हस्ताक्षर अभियान, चर्चा आदि केरऽ माध्यम स॑ लोगऽ क॑ ई अभियान स॑ जोड़लऽ जैतै ।
अखिल भारतीय अंगिका पत्रकार एवं लेखक संघ केरऽ राष्ट्रीय संयोजक, डॉ. शशिधर मेहता न॑ बतैलकै कि अंगिका भाषा-भाषी म॑ स॑ एगो बड़ऽ तबका क॑ ई तलक पता नै छै कि हुनका सब के भाषा अंगिका छेकै । अंगिका क॑ हुनी सब ठेठी कही क॑ पुकारै छै । एकरऽ नाजायज फायदा मैथिली भाषा-भाषी उठाबै छै । जागरूकता अभियान केरऽ अनेक लक्ष्य म॑ स॑ एक लक्ष्य ई भी छेकै कि करोड़ों लोगऽ द्वारा बोललऽ जाय वाला अंगिका भाषा भाषी अपनऽ भाषा क॑ सम्मान के दृष्टि स॑ देख॑ लाग॑ ।
डॉ. शशिधर मेहता न॑ बतैलकै कि अंगिका क॑ संवैधानिक दर्जा देलाबै बास्तें माँग पत्र आरू शांतिपूर्ण प्रदर्शन के माध्यम सें भारत सरकार केरऽ लगातार धियान देलैलऽ जैतै ।
डॉ. मेहता न॑ बतैलकै कि अंगिका जागरण अभियान केरऽ मूल नारा छेकै - "भीख नै करजा, अंगिका क॑ दरजा" । हुनी बतैलकै कि अंगिका जागरण अभियान क॑ तेज करै वास्तें अखिल भारतीय अंगिका पत्रकार एवं लेखक संघ केरऽ दिल्ली के बाहर चार जगह प॑ कार्यालय खोललऽ गेलऽ छै ।
अंगिका भाषा क॑ संवैधानिक मान्यता दिलाबै हेतु दिल्ली स्थित अखिल भारतीय अंगिका पत्रकार एवं लेखक संघ केरऽ "अंगिका जनजागरण अभियान" सें जुड़ै लेली उपर देलऽ गेलऽ कोय भी पता प॑ संपर्क साधलऽ जाब॑ सकै छै ।
No comments:
Post a Comment