अंगिका क॑ राजभाषा के दर्जा दै लेली झारखंड सरकार के प्रति प्रकट करलऽ गेलै आभार आरूबिहार सरकार सें करलऽ गेलै अंगिका क॑ राजभाषा के दर्जा दै के माँग | News in Angika

भागलपुर । झारखंड सरकार द्वारा अंगिका भाषा क॑ द्वितीय राजभाषा के रूप म॑ स्वीकार करला प॑ काल अंग उत्थान आन्दोलन समिति,बिहार-झारखंड द्वारा स्थानीय स्टेशन चौक प॑ हर्ष अभिनंदन सह आभार समारोह म॑ समिति अध्यक्ष गौतम सुमन न॑ कहलकै कि झारखंड स्थित छः जिला के लोकभाषा अंगिका क॑ द्वितीय राजभाषा के दर्जा दै वाला अध्यादेश क॑ मंजूरी द॑ क॑ झारखंड सरकारें लोकभाषा के प्रति अपनऽ उदारता व सजगता दिखाबै के सराहनीय कार्य करल॑ छै । हुनकऽ ई कार्य सें अंग क्षेत्र म॑ खुशी के लहर छै । हुनी कहलकै कि झारखंड सरकार केरऽ ई सराहनीय कार्य के प्रशंसा लेली कोय भी शब्द कम पड़ी जाय छै ।

अंग उत्थान आन्दोलन समिति,बिहार-झारखंड केरऽ भागलपुर स्टेशन चौक प॑ हर्ष अभिनंदन सह आभार समारोह

श्री सुमन न॑ कहलकै कि झारखंड सरकार द्वारा लोकभाषा अंगिका के प्रति ई तरह के संवेदनशीलता व सजगता सें बिहार सरकार क॑ भी सीख लेना चाहियऽ,कैन्ह॑ कि बिहार स्थित पन्द्रह जिला म॑ लगभग चार करोड़ लोगऽ द्वारा नै केवल अंगिका बोललऽ जाय छै भलुक अपनऽ साँसऽ म॑ ई अंगिका भाषा क॑ रचाय-बसाय क॑ जीयै-मरै छै ।

हुनी कहलकै कि अंग-अंगिका केरऽ समृद्धि के बगैर बिहार के समृद्धि कतई संभव नै छै । अंग-अंगिका केरऽ समुचित सम्मान व अधिकार के बगैर बिहार बहियार ऐसनऽ झलकै छै । एकरऽ बावजूद बिहार सरकार न॑ खाली एक अकादमी गठन के सिवा ई दिशा म॑ कोय सकारात्मक कार्य नै करल॑ छै । जब कि झारखंड सरकारें पहल॑ लोक सेवा आयोग, कर्मचारी चयन आयोग केरऽ परीक्षा म॑ अंगिका भाषा क॑ शामिल करलकै आरू अब॑ अंगिका भाषा क॑ राजकीय भाषा के दर्जा द॑ क॑ अभूतपूर्व कार्य करल॑ छै ।

[embed]https://youtu.be/tTTRiPAumNE?t=14m35s[/embed]

झारखंड सरकार द्वारा अंगिका भाषा क॑ द्वितीय राजभाषा के रूप म॑ स्वीकार करला पर अंग उत्थान आन्दोलन समिति,बिहार-झारखंड द्वारा स्थानीय स्टेशन चौक प॑ हर्ष अभिनंदन सह आभार समारोह के आयोजन करलऽ गेलै । ई मौका प॑ रंग-अबीर उड़ैलऽ गेलै आरू मिठाय बाँटलऽ गेलै ।

ई मौका प॑ पूर्व महापौर डॉ वीणा यादव न॑ कहलकै कि झारखंड सरकार लोकभाषा के प्रति तेजी सें सजगता दिखाय क॑ कुशल नेतृत्व क्षमता क॑ प्रकट करल॑ छै । हुनी कहलकै कि ई तरह के कुशलता हेतु बिहार सरकार सें भी लोगऽ के ऐसने अपेक्षा छै ।

अंगिका साहित्यकार श्री सुधीर कुमार प्रोग्रामर न॑ कहलकै कि संघर्ष हमेशा रंग लानै छै आरू लानतै । अंगिका भाषा क॑ समुचित सम्मान व अधिकार लेली अब॑ आरू संस्था नै बल्कि आस्था प्रकट करै वास्त॑ हुनी अंगिका भाषियऽ स॑ अपील करलकै ।

डॉ जयंत जलद न॑ माँग करलकै कि बिहार सरकार भी अंगिका भाषा क॑ यथाशीघ्र द्वितीय राजभाषा केरऽ श्रेणी म॑ शामिल कर॑ ।

पारस कुंज न॑ सवाल करतें हुअ॑ कहलकै कि जब॑ अंगिका भाषा के प्रति झारखंड सरकार एतना सजगता व संवेदनशीलता दिखाय रहलऽ छै त॑ बिहार सरकार द्वारा ई भाषा के प्रति उदासीनता कैन्हें ?

वहीं धीरज पंडित न॑ कहलकै कि अब॑ वू दिन दूर नै जब॑ अंगिका भाषा भारतीय संविधान केरऽ आठमऽ अनुसूची म॑ शामिल होय क॑ अपनऽ परचम फहरैतै ।

अंत म॑ समिति तरफऽ स॑ ई कार्य हेतु झारखंड केरऽ मुख्यमंत्री रघुवर दास सहित विधायक अमित मंडल, अशोक भगत, लोबिन हैम्ब्रम,पूर्व विधायक राजेश रंजन व डॉ प्रदीप प्रभात के प्रति आभार प्रकट करी क॑ उपस्थित सब लोगऽ क॑ बधाय देलऽ गेलै आरू झारखंड सरकार केरऽ जय घोष करी झारखंड सरकार जिंदाबाद केरऽ नारा लगैलऽ गेलै ।

ई मौका प॑ सुनील सिंह,कपिलदेव कृपाला,अभय कुमार भारती,पवन कुमार,हरि यादव,महेश सिंह, मुरारी आरनि भी उपस्थित छेलै ।