जापान केरऽ सहायता सें बिहार म॑ मिनी बुलेट-मेट्रो जैसनऽ ट्रेन लानै के तैयारी, नीतीशकुमार १८ फरवरी सें चार दिना के जापान दौरा प॑ | News in Angika

नयी दिल्ली :जापान केरऽ सहायता सें बिहार म॑ मिनी बुलेट-मेट्रो जैसनऽ ट्रेन लानै के तैयारी चली रहलऽ छै । बिहार केरऽ मुख्यमंत्री नीतीश कुमार १८ फरवरी सें चार दिना लेली जापान दौरा प॑ जाय रहलऽ छै । ई दौरान बिहार म॑ मिनी बुलेट-मेट्रो टाइप ट्रेन लानै क॑ ल॑ क॑ नीतीश सरकार आरू जापान सरकार के बीच औपचारिक समझौता करलऽ जाय के संभावना जतैलऽ जाय रहलऽ छै । ई ट्रेन पटना सें बोधगया के बीच लगभग १०० किलोमीटर के बीच चलतै ।


मालूम हुअ॑ कि ई रूट केरऽ पर्यटन के लिहाज सें भी काफी महत्व छै । पूरा विश्व के बौद्ध अनुयायी लेली बोधगया सबसें बड़ऽ धार्मिक स्थल छेकै । ई महत्वाकांक्षी प्रॉजेक्ट क॑ जापान सरकार फंड देतै । चर्चा छै कि ई ट्रेन समझाैता के अलावा जापान सें रेकार्ड निवेश केरऽ प्रॉजेक्ट्स क॑ भी बिहार म॑ लानै लेली अंतिम रूप देलऽ जाय रहलऽ छै ।

प्रमुख समाचार पत्र एनबीटी आरू प्रभात खबर केरऽ वेबसाइट प॑ चली रहलऽ खबर म॑ सूत्रऽ के अनुसार बतैलऽ गेलऽ छै कि पटना-बोधगया के बीच १०० किलोमीटर के यात्रा म॑ राजगीर, नालंदा स्टेशन होतै । ई पूरा रूट अंडरग्राउंड होतै । ई प्रॉजेक्ट सें जुड़लऽ अधिकारियऽ के मानऽ त॑ ई ट्रेन के स्वरूप मेट्रो आरू बुलेट केरऽ तर्ज पर बनतै । जापान दौरा में विशेषज्ञऽ के साथ बातचीत करी क॑ एकरा अंतिम रूप देलऽ जैतै । दावा करलऽ जाय रहलऽ छै कि बिहार केरऽ ई अब तलक के सबसें महंगऽ प्रॉजेक्ट आरू निवेश हुअ॑ सकै छै ।

नीतीश कुमार के साथ बिहार सरकार केरऽ एगो हाई लेवल प्रतिनिधिमंडल भी जापान जाय रहलऽ छै । ई बड़ऽ प्रॉजेक्ट के अलावा राज्य सरकार जापान सरकार सथें करोड़ों रुपया के दोसरऽ निवेश प॑ भी समझौता कर॑ सकै छै । हाल के वरसऽ म॑ नीतीश कुमार केरऽ अपनऽ राज्य में निवेश लानै लेली पहलऽ विदेश यात्रा छेकै ।

(Source : https://navbharattimes.indiatimes.com/india/nitish-kumar-to-visit-japan-for-mini-bullet-train-in-bihar/articleshow/62838163.cms)