अंगिका सहित २३ भाषा म॑ पायल कश्यप केरऽ निर्देशन म॑ बनतै बाबधाम (देवघर) प॑ फिल्म | News in Angika

बाबाधाम (देवघर) । बाबा वैद्यनाथ केरऽ महिमा प॑ अंगिका भाषा (देवघरिया आरू खोरठा अंगिका) म॑ झारखंड फिल्म टेक्निकल एडवाइजरी कमेटी सदस्य सह फिल्म निर्देशिका पायल कश्यप फिल्म बनाय ल॑ जाय रहलऽ छै । बाबा केरऽ महिमा प॑ आधारित ई फिल्म २३ अलग-अलग भाषा म॑ डब होय क॑ सौंसे भारत म॑ प्रदर्शित होतै ।

निर्देशक पायल कश्यप केरऽ अनुसार फिल्म केरऽ टाइटल होतै ‘वैद्यनाथधाम - जहां पूरी होती है सबों की मनोकामना'। ई धार्मिक फिल्म क॑ देवघर म॑ बोललऽ जाय वाला देवघरिया अंगिका भाषा म॑ शूट करी क॑ प्रदर्शित करलऽ जैतै । बाद म॑ पूरे भारत म॑ प्रदर्शन लेली एकरा आवश्यकतानुसार २३ भाषा म॑ डब करलऽ जैतै ।

फिल्म केरऽ टाइटल के बारे म॑ पूछला प॑ पायल के कहना छै कि काम केरऽ सिलसिला म॑ हुनका पश्चिम आरू दक्षिण भारत केरऽ शहरऽ म॑ जाय ल॑ पड़ै छै । जहांकरऽ लोगें वैद्यनाथधाम केरऽ बारे म॑ जानै ल॑ चाहै छै । तभी हम्म॑ निश्चय करलियै कि फिल्म बाबा वैद्यनाथ केरऽ महिमा प॑ एगो फिल्म बनैबै, जेकरऽ टाइटल ही वैद्यनाथधाम होतै ।

झारखंड केरऽ कलाकारऽ सिनी क॑ ई फिल्म म॑ मौका मिलतै । फिल्म केरऽ महत्वपूर्ण कलाकारऽ म॑ सें अधिकांश कलाकार झारखंड केरऽ होतै । ई फिल्म जगदीश फिल्म प्रोडक्शन केरऽ बैनर तले बनी रहलऽ छै । हुनका अनामिका फिल्म्स इंटरनेशनल केरऽ अरुण कुमार मंडल आरू मयूरी मोशन फिल्म केरऽ संजीव कुमार सिंह व दिवाकर तिवारी सें काफी सहयोग मिली रहलऽ छै । फिल्म केरऽ कहानी रमेश चंद्र झा, पटकथा विजय सिंह सोलंकी आरू संवाद आरती त्रिपाठी न॑ तैयार करल॑ छै । बहुत्ते हिंदी फिल्मऽ लेली संगीत बनाय चुकलऽ संगीतकार रूपेश बर्मा ई फिल्म केरऽ संगीत तैयार करी रहलऽ छै । गीत देवघर केरऽ रवि सोनू तैयार करी रहलऽ छै ।

फिल्म केरऽ प्रदर्शन सावन माह म॑ करलऽ जैतै । फिल्म केरऽ विशेष आकर्षण म॑ बाबा केरऽ शृंगार पूजा व कांचा जल केरऽ अलावे शिवरात्रि महोत्सव द्वारा निकाललऽ जाय वाला शिव बारात होतै ।

( Source : https://www.livehindustan.com/jharkhand/deogarh/story-payal-was-filming-in-23-languages-on-vaidyanath-dham-1801481.html)