बिहार सरकार न॑ अंगिका केरऽ विकास लेली कोय फंड नै देलकै, अंगिका के हक लेली आंदोलन के जरूरत - अध्यक्ष, बिहार अंगिका अकादमी | News in Angika

नवगछिया । बिहार अंगिका अकादमी केरऽ अध्यक्ष केरऽ कहना छै कि बिहार सरकार न॑ अकादमी के त॑ गठन करी देलकै लेकिन अकादमी केरऽ गतिविधि क॑ चलाय क॑ अंगिका केरऽ विकास करै ल॑ कोय फंड अखनी ताँय नै देल॑ छै । हुनी कहलकै कि अंगिका क॑ एकरऽ हक देलाय ल॑ आंदोलन के जरूरत छै ।

गत दू फरवरी क॑ नवगछिया केरऽ जयमंडल टोला परबत्ता म॑ अंगिका दिवस केरऽ अवसर प॑ साहित्य गोष्ठी आरू कवि सम्मेलन केरऽ आयोजन केरऽ अध्यक्षीय भाषण म॑ हुनी अंगिका साहित्यकार, पत्रकार आरू आम जनऽ क॑ संबोधित करी रहलऽ छेलै । अंगिका केरऽ ध्वनि वैज्ञानिक डॉ. रमेश मोहन शर्मा आत्मविश्वास केरऽ नेतृत्व म॑ ई सम्मेलन केरऽ आयोजन भेलै ।

कार्यक्रम केरऽ अध्यक्षता बिहार अंगिका अकादमी केरऽ अध्यक्ष प्रो. (डॉ.) लखन लाल सिंह आरोही न॑ करलकै । कार्यक्रम केरऽ उद्घाटन अतिथि केरऽ रूप म॑ मौजूद (डॉ.) लखन लाल सिंह आरोही, डॉ. रतन कुमार मंडल, डॉ. छेदी साह, बाबा स्फोटाचार्य, स्वामी आशीषानंद जी महाराज, स्वागताध्यक्ष प्रखंड जदयू केरऽ अध्यक्ष गुलशन कुमार, मंच संचालक कवि श्रवण बिहारी न॑ संयुक्त रूप सें दीप जलाय क॑ करलकै । ई अवसर प॑ सर्वश्री महेंद्र सिंह निशाकर, साथी सुरेश सिंह, शंकर साह, प्रो.(डॉ.) अर्जुन मंडल, फूल कुमार अकेला केरऽ किताब केरऽ लोकार्पण भी होलै ।

ई अवसर प॑ सर्वश्री महेंद्र सिंह निशाकर, साथी सुरेश सिंह, शंकर साह, प्रो.(डॉ.) अर्जुन मंडल, फूल कुमार अकेला, डॉ. मीरा झा, विनय कुमार दर्शन, देवेन्दु झा, ब्रह्मदेव ब्रह्म, रामानंद गुप्त, डॉ. अमलेंदु कुमार आरनि अंगिका साहित्यकार उपस्थित रहै ।