कहिया अवतरित भेलै मानव

—  कुंदन अमिताभ —

धरती पर मानव केरऽ अस्तित्व केतना पुरानऽ छै ? इ सवाल केरऽ जबाब खोजै केरऽ प्रयास लगातार होतं॑ रहलऽ छै. पर ठीक-ठीक कुछ पता नै चल॑ पारलऽ छै. ऐन्हऽ मं॑ समय – समय पर मिललऽ पुरातात्विक अवशेष ही अनुमान लगाबै के मुख्य आधार बनै छै. लगातार होय रहलऽ वैज्ञानिक शोध सं॑ कुछ नयऽ पहलू क॑ बीच-बीच मं॑ जानै के मौका मिलै छै. हाल मं॑ ‘जर्नल ऑफ ह्यूमन इवोल्यूशन ‘ मं॑ प्रकाशित एगो रिपोर्ट इ दिशा मं॑ कुछ नयऽ जानकारी प्रमाणिकता के साथ पेश करन॑ छै.

150 बरस पहिनै जीव वैज्ञानिक डार्विन आपनऽ खोजऽ सं॑ इ निष्कर्ष पर पहुँचलऽ रहै कि  मानव केरऽ पूर्वज बंदर छेकै. बंदर, चिपांजी,बनमानुस, गुरिल्ला बगैरह ओह॑ जीवजाति केरऽ शाखा छेकै, जेकरऽ एक शाखा इंसान रूपऽ मं॑ विकसित होलै. पर इंसान बाँकी बानर जाति सं॑ पूरा तरह सं॑ कहिया अलग होलै एकरा पर वैज्ञानिक समुदाय एकमत नै छै.

औजार बनाबै के मूल गुण आरू हड्डी पर पैलऽ गेलऽ ओकरऽ निशान केरऽ आधार पर बंदर जाति सं॑ इंसान जाति केरऽ अलगाव के समय के अनुमान लगैलऽ जाय छै. इ अलगाव के समय के बारे मं॑ समय-समय पर नयऽ जानकारी मिली रहलऽ छै.

दस साल पहिन॑ 2005 ई. तलक इ मानलऽ जाय रहै कि अफ्रीका मं॑ इथियोपिया केरऽ आसपास केरऽ इलाका मं॑ लगभग 20 लाख साल पहिन॑ इंसान न॑ अलग जीवजाति के रूप मं॑ आपनऽ सफर केरऽ शुरूआत करन॑ छेलै.

2009 ई. के आसपास पता चललऽ रहै कि इथियोपिया मं॑ 26 लाख साल पुरानऽ पत्थर केरऽ औजार खोजलऽ गेलऽ छै.

2010 ई. मं॑ इथियोपिया के दिकिका इलाका मं॑ 34 लाख साल पुरानऽ कुछ ऐन्हऽ हड्डी मिललऽ रहै जेकरा बारे मं॑ बतैलऽ गेलऽ रहै कि ओकरा पर पत्थर केरऽ औजार सं॑ शिकार करै के निशान छै.

2011 ई. मं॑ इथियोपिया केरऽ दिकिका इलाका मं॑ ही 33 लाख साल पुरानऽ कोनो ऐन्हऽ जीव केरऽ हड्डी खोजलऽ गेलऽ रहै जे बनमानुस केरऽ तुलना मं॑ इंसान केरऽ जादे करीब छेलै.

2012 ई. मं॑ कुछ पुरातत्वविदऽ नं॑ 2010 ई. केरऽ खोज क॑ खारिज करतं॑ कहन॑ रहै कि हड्डी पर पैलऽ गेलऽ निशान संभवतः कंकड़-पत्थर केरऽ प्राकृतिक खरोंच चलतं॑ होलऽ हुअ॑.

2015 ई. मं॑ ‘जर्नल ऑफ ह्यूमन इवोल्यूशन‘ मं॑ प्रकाशित एगो रिपोर्ट मं॑ प्रामाणिक तर्क देतं॑ हुऐ इ साबित करलऽ गेलऽ छै कि बारहसिंघा आरू भैंस ऐन्हऽ जीवऽ के पैलऽ गेलऽ हड्डी पर जोन तरह के निशान मौजूद छै वू पत्थर केरऽ धारदार हथियार सं॑ करलऽ गेलऽ शिकार के अलावा कोनो आरू जैविक या प्राकृतिक घटना केरऽ उपज नै हुअ॑ सक॑ छै. अनुमानतः इंसान जाति 35 लाख साल या होकरौ सं॑ जादा पहिनै बंदर जाति सं॑ अलग होलऽ रहै.

Angika Samvad – Abri Dafi : अंगिका संवाद – अबरी दाफी  : कहिया अवतरित भेलै मानव
Columnist (स्तंभकार) : Kundan Amitabh (कुंदन अमिताभ)

angika_samvad_Manav_Jati

Comments are closed.