नई दिल्ली ।शहीद जवानौ सभ क श्रद्दांजलि अर्पित करतें प्रधानमंत्री ने आतंकी संगठन सब क आरू ओकरौ सरपरस्त सब क ललकारतें हुए कहलकै कि हुनी बहुत बड़ौ गलती करी चुकलौ छै । प्रधानमंत्रियें देश क भरोसा देतें कहलकै कि हमला के पीछे जे ताकत छै, आरू ई हमला के जे भी गुनहगार छै, ओकरा सब क  ओकरौ करनी के सजा अवश्य मिलतै ।

प्रधानमंत्री केरौ ट्वीटर संदेश

ई बीच प्रधानमंत्री नरेंद्र मोदी ने कहलै छै कि सुरक्षा बलौ क आगू के कार्रवाई लेली समय, स्थान व स्वरूप तय करै के पूरा आजादी द देलै छै ।हुन्नें सीआरपीएफ नें कहलै छै कि वू अपनौ ४० जवान सब के शहादत क नै त भूलतै नै ही माफ करतै, बल्कि एकरौ बदला लेतै ।

शहीद जवान सब क श्रद्धांजलि अर्पित करतें प्रधानमंत्री

पुलवामा घटना के बाद पाकिस्तान सें मोस्ट फेवर्ड नेशन केरौ दर्जा भी छिनी लेलौ गेलौ छै । ई बीच शुक्रवार शाम क शहीद जवान सब के पार्थिव शरीर वायुसेना केरौ विमान सें श्रीनगर सें नई दिल्ली लानलौ गेलै ।

प्रधानमंत्री नरेंद्र मोदी ने पार्थिव शरीर क ताबूत के सामने बनलौ एगो मंच प पुष्पचक्र चढ़ैलकै । ओकरौ बाद शहीदो के पार्थिव शरीर क हुनका सब के पैतृक गाँव भेजलौ गेलै । एकरौ पहलें भोरे केंद्रीय मंत्री राजनाथ सिंह श्रीनगर गेलै आरू शहीद क श्रद्धांजलि देलकै । हुनी अर्थी का अपनौ काँधा भी देलकै ।

बिहार के मुख्यमंत्री बिहार के दूनू शहीद जवानौ क श्रद्धांजलि अर्पित करतें हुऐ । दायाँ तरफ शहीद रतन कुमार ठाकुर केरौ पार्थिव शरीर

बिहार के शहीद जवानौ सिनी, हवलदार संजय कुमार सिन्हा आरू सिपाही रतन कुमार ठाकुर, के पार्थिव शरीर पटना पहुँचला के बाद बिहार के मुख्यमंत्री नीतीश कुमारें पुष्पचक्र चढ़ाय करी क श्रद्धांजलि अर्पित करलकै । बिहार के दूनू शहीद जवानौ क श्रद्धांजलि अर्पित करतें हुऐ हुनी कहलकै कि बिहार हुनकौ साहस क सलाम करै छै । हुनी कहलकै कि हुनका सब क ११ लाख रूपया के साथ-साथ मुख्यमंत्री राहत कोष सें २५ लाख रूपया के राशि देलौ जैतै । साथ ही शहीदौ के परिजनौ सब क हर संभव हर तरह के सहायता प्रदान करलौ जैतै ।

 

 

 

Comments are closed.

error: Content is protected !!