भागलपुर : संसद मं॑ सांसद जयप्रकाश नारायण यादव न॑ अंग देस आरू बिहार केरऽ पर्यटन के मुद्दा क॑ एक बार फेरू सं॑ उठैन॑ छै । हुनी कहलकै कि अंग देस आरू बिहार मं॑ पर्यटन केरऽ अपार संभावना छै । लेकिन एकरऽ अनदेखी करलऽ जाय रहलऽ छै ।

हुनी कहलकै कि यहाँ बुद्ध आरू महावीर जैन सं॑ जुड़लऽ स्थल के साथ-साथ कईएक पौरानिक, ऐतिहासिक आरू प्राकृतिक स्थल भी मौजूद छै जे यहाँकरऽ सांस्कृतिक धरोहर छेकै । जेकरा मं॑ राजगीर, बोधगया, मंदार परबत, विक्रमशिला, भीम बाँध, तेलडीहा, सिंगरिसी, पिपरा, सुदीमा, ऋसि कुंड, सीता कुंड, सुलतानगंज केरऽ काँवड़ मेला आदि सामिल छै ।

हुनी सदन म॑ कहलकै कि भारत सरकार न॑ घोसना करन॑ रहै कि पर्यटन स्थल क॑ बेहतर बनाबै लेली धनराशि मुहैय्या करैलऽ जैतै, पर अखनी तलक ई मुहैय्या नै करैलऽ गेलऽ छै । हुनी सरकार सं॑ अनुरोध करन॑ छै कि बिहार केरऽ पर्यटन स्थल क॑ बेहतर बनाबै लेली जल्दी सं॑ जल्दी धनराशि मुहैय्या करैलऽ जाय ।

Comments are closed.