साहेबगंज : प्रधानमंत्री नरेंद्र मोदी आय ‘अंग’ के साहेबगंज म॑, ४००० करोड़ रू. के प्रोजेक्ट केरऽ शिलान्यास करतै ।

पीएम साहेबगंज में लगभग १ घंटा १५ मिनट रहतै । दिन केरऽ १२:१५ बजे कार्यक्रम स्थल पहुंचतै आरू  १:३० बजे वहां स॑ वापस रवाना होय जैतै । पीएम साहेबगंज म॑ गंगा पुल आरू मल्टी मॉडल हब केरऽ शिलान्यास करतै ।

प्रधानमंत्री नरेंद्र मोदी

प्रधानमंत्री नरेंद्र मोदी

हुनी गोविंदपुर-जामताड़ा-दुमका-बरहेट-साहेबगंज पथ केरऽ उद्घाटन करतै । ३११ किलोमीटर लंबा ई  सड़क १३६८ करोड़ रू. के लागत स॑ बनलऽ छै । एकरऽ अलावे साहेबगंज व्यवहार न्यायालय में ९० किलोवाट व सदर अस्पताल में ७० किलोवाट के सोलर पावर प्लांट के उद्घाटन करतै । साहेबगंज में ३४ करोड़ के लागत स॑ बनै वाला ५० हजार लीटर क्षमता के डेयरी प्लांट के भी शिलान्यास भी करतै । मौका पर एक लाख सखी मंडल क॑ स्मॉर्ट फोन देलऽ जैतै । साथ ही आदिम जनजाति बटालियन क॑ नियुक्ति पत्र भी देलऽ जैतै।

एकरऽ पहिन॑ ११:३० बजे प्रधानमंत्री पूर्णिया सैन्य हवाई अड्डा पहुंचतै । ११:३५ बजे साहेबगंज लेली रवाना होतै । १२ बजे साहेबगंज हेलीपैड पहुँचतै । १२:१५ बजे कार्यक्रम स्थल पहुँचतै । करीब १३० बजे पूर्णिया होतं॑ हुअ॑ दिल्ली लेली रवाना होय जैतै ।

साहेबगंज म॑ मल्टी मॉडल रीभर पोर्ट टर्मिनल (बंदरगाह) बनतै । करीब २८० करोड़ रुपया के लागत स॑ एकरऽ निर्माण करैलऽ जैतै । एखरऽ काम एल एंड टी क॑  देलऽ गेलऽ छै ।  ई तरह जलमार्ग के भी  शुरुआत करलऽ जैतै । साहेबगंज स॑ वाराणसी तक जलमार्ग शुरू करै के दिशा म॑   करलऽ जाय रहलऽ ई प्रयास दरअसल फरक्का स॑ वाराणसी के बीच जलमार्ग शुरू करै केरऽ हिस्सा छेकै । एकरा लेली तेजी स॑ काम करलऽ जाय रहलऽ छै । प्रधानमंत्री नरेंद्र मोदी  ई परियोजना के शिलान्यास करतै ।

एकरऽ अलावे प्रधानमंत्री आय यहां साहेबगंज में गंगा ब्रिज केरऽ परियोजना के भी शिलान्यास करतै । ई गंगा पुल अंग देश केरऽ साहेबगंज (झारखंड) आरू अंग देश केरऽ ही मनिहारी (बिहार) क॑ जोड़ै ल॑ बनतै ।  गंगा ब्रिज केरऽ काम सोना चेक कंपनी लिमिटेड क॑ देलऽ गेलऽ छै । करीब 2000 करोड़ केरऽ  लागत स॑ पुल व एप्रोच रोड केरऽ निर्माण करैलऽ जैतै ।

ई दूनो परियोजना के शिलान्यास के साथ ही गोविंदपुर-साहेबगंज सड़क के भी उदघाटन प्रधानमंत्री करतै । ई सड़क केरऽ निर्माण कराय लेलऽ गेलऽ छै । वर्ष २०११ केरऽ ई परियोजना क॑ करीब १३०० करोड़ रुपये म॑ पूरा करलऽ गेलऽ छै ।  ३११ किमी लंबा ई परियोजना एडीबी संपोषित छेकै ।

एकरऽ साथ ही सखी मंडल केरऽ महिला सिनी क॑ एक लाख स्मार्ट फोन भी प्रधानमंत्री के हाथों  वितरित करबाबै के तैयारी करलऽ गेलऽ छै ।सोलर ऊर्जा स॑ संबंधित योजना के शिलान्यास व उदघाटन के भी तैयारी करलऽ गेलऽ छै ।

Comments are closed.