पाकुड़: जम्मू-कश्मीर में लद्दाख क्षेत्र केरऽ बटालिक सेक्टर म॑ बार-बार हिमस्खलन होला स॑ झारखंड केरऽ तीन सैनिक शहीद होय गेलै । शहीदऽ म॑ अंग क्षेत्र के पाकुड़ केरऽ लांस नायक बिहारी मरांडी भी छै ।  सैन्य अधिकारी न॑ बतैलकै कि अप्रत्याशित बर्फबारी स॑ बटालिक सेक्टर म॑ बार बार हिमस्खलन होलै, जेकरा स॑ सैन्य चौकी बर्फ के नीचें दबी गेलै । पाँच सैनिक बर्फ के नीचें दबी गेलै । ओकरा म॑ सें दू क॑ निकाली लेलऽ गेलै, लेकिन तमाम कोशिशऽ के बाद भी अन्य तीन सैनिकऽ क॑ बचैलऽ नै  जाब॑ सकलकै । ओकरऽ शव बरामद करी लेलऽ गेलऽ छै ।

शहीद बिहारी मरांडी पाकुड़ जिला केरऽ हिरणपुर थाना क्षेत्र अंतर्गत रामनाथपुर गांव के रहै वाला छेलै । परिजनऽ क॑ एकरऽ जानकारी गुरुवार, ७ अप्रैल-२०१७ क॑ रात करीब साढ़े नौ बजे फोन स॑ मिललै । खबर मिलथैं सौसे घरऽ में मातम पसरी गेलै । परिजनऽ के मुताबिक हुनी हरदिल अजीज छेलै ।  चार भाइयऽ म॑ हुनी तीसरा नंबर पर छेलै । ई साल परिजन हुनकऽ शादी करै ल॑ चाहै छेलै । शहीद बिहारी मरांडी केरऽ तीन  भाय अर्द्धसैनिक बल में छै ।

शहीद जवान नाइकी बिहारी मरांडी तीनपहाड़ केरऽ मुरली मिशन सें मैट्रिक के परीक्षा पास करन॑ छेलै ।  बाद में साहिबगंज कॉलेज सें इंटर आरू  इग्नू सें स्नातक के पढ़ाई पूरा करला के बाद फौज में चललऽ गेलऽ छेलै । हुनी जब॑ भी छुट्टी में गांव आबै छेलै, लोगऽ सिनी क॑ देशभक्ति व देश सेवा के खिस्सा बताबै छेलै ।  हुनकऽ शहीद होला सें खाली परिजन ही नै, सौसे गांव के लोग शोकाकुल छै ।

(साभार : http://www.prabhatkhabar.com/news/pakur/story/966888.html)

Comments are closed.