मुख्यमंत्री नँ अररिया, किशनगंज आरू कटिहार केरौ बाढ़ प्रभावित इलाका के करलकै हवाई सर्वेक्षण | News in Angika | CM nitish Kumar conducted aerial survey of flood affected areas of Araria, Kishanganj and Katihar of Ang Pradesh.

पुर्णिया, १५ जुलाई, २०१९ ।अंग क्षेत्र केरौ अररिया, किशनगंज, सहरसा, सुपौल,  पूर्णिया आरू कटिहार जिला बूहो के गंभीर समस्या सँ जूझी रहलौ छै ।  मुख्यमंत्री नँ ई सब जिला केरौ बाढ़ प्रभावित इलाका के हवाई सर्वेक्षण करलकै । आशा जतैलौ जाय रहलौ छै कि एकरा सँ राहत व बचाव कार्य मँ तेजी ऐतै ।

बिहार केरौ 12 जिला मँ ऐलो बूहो सण अब तलक 24 लोगो के मौत भ चुकलौ छै, जबकि 25 लाख 66 हजार सँ अधिक लोग प्रभावित होलो छै। आपदा प्रबंधन विभाग सँ सोमवार क प्राप्त जानकारी के मुताबिक, बिहार केरौ 12 जिला – शिवहर, सीतामढ़ी, मुजफ्फरपुर, पूर्वी चंपारण, मधुबनी, दरभंगा, सहरसा, सुपौल, किशनगंज, अररिया, पूर्णिया आरू कटिहार – मँ बूहो के स्थिति गंभीर बनलौ छै ।

बिहार केरौ उत्तरी हिस्सा आरू नेपाल के तराई क्षेत्र मँ होय रहलौ लगातार बारिश के बाद कईएक नदी सिनी के जलस्तर बढ़ी गेलौ छै । जेकरा सँ राज्य के कम सँ कम छह जिला मँ बाढ़ के स्थिति उत्पन्न होय गेलौ छै । ई बीच, राज्य केरौ बहुत्ते स्थानौ पर रेल पटरी पर पानी चढ़ी गेला सँ  रेल यातायात बाधित होलौ छै । राज्य मँ भारी बारिश कोसी आरू अंग क्षेत्र केरौ क्षेत्रो मँ तबाही ल क ऐलौ छै । कोसी के जलस्तर मँ लगातार वृद्घि होय रहलै छै । जेकरा सँ कई क्षेत्र मँ बाढ़ के पानी घुसी गेलौ छै । वीरपुर बैराज के बाढ़ नियंत्रण कक्ष के मोताबिक, शनिवार सँ ही कोसी के जलस्तर मँ लगातार वृद्घि दर्ज करलौ जाय रहलौ छै । नेपाल मँ भारी बारिश सँ कोसी के अलावे गंडक बैराज के भी जलस्तर बढ़ी गेलौ छै ।

मुख्यमंत्री नीतीश कुमार नँ सोमवार क अररिया जिला के फारबिसगंज, सिकटी, पलासी व जोकिहाट, किशनगंज जिला के ठाकुरगंज, कोचाधामन व टेढ़ागाछ, कटिहार जिला के बलरामपुर के बाढ़ प्रभावित इलाका के विस्तृत हवाई सर्वेक्षण करी क स्थिति के जायजा लेलकै। हवाई सर्वेक्षण के बाद मुख्यमंत्री नँ पूर्णिया जिला के चूनापुर हवाई अड्डा पर पूर्णिया, अररिया, कटिहार व किशनगंज जिला के जिलाधिकारियो के साथ बैठक करी क बूहो व बचाव तथा राहत कार्य के स्थिति के विस्तृत समीक्षा करलकै । मुख्यमंत्री नँ बाढ़ प्रभावित सब्भे क्षेत्रौ मँ राहत व बचाव कार्य तेज करै तथा ग्रामीण कार्य विभाग व पथ निर्माण विभाग के प्रधान सचिव आरू सचिव क बाढ़ प्रभावित क्षेत्रो मँ हवाई सर्वेक्षण करी क स्थिति के जायजा लै के निर्देश देलकै।

बिहार के बाढ़ प्रभावित ई 12 जिला मँ कुल 196 राहत शिविर चलैलौ जाय रहलौ छै । जहां 1,06,953 लोग शरण लेनै छै। उनको भोजन के व्यवस्था लेली 644 सामुदायिक भंसा चलैलौ जाय रहलौ छै। बाढ़ प्रभावित इलाका मँ राहत व बचाव कार्य लेली एनडीआरएफ आरू एसडीआरएफ के कुल 26 टीमौ क लगैलै गेलौ छै तथा 125 मोटरबोट के इस्तेमाल करलौ जाय रहलौ छै ।

Comments are closed.

error: Content is protected !!