भागलपुर : बिहार केरॊ मुख्यमंत्री नीतिश कुमार कॆ अंग उत्थानान्दोलन समिति (अंगुआस) द्वारा स्मार पत्र  सौंपी कॆ आग्रह करलॊ गेलॊ छै कि पूर्व घोषित अंगिका अकादमी गठन केरॊ आश्वासन कॆ यथाशीघ्र अमलीजामा पहनैलॊ जाय. साथॆं-साथ इ आशा व्यक्त करलॊ गेलॊ छै कि हुनी अंग – अंगिका कॆ वाजिब सम्मान आरू अधिकार दिलाबै के दिशा मॆं अंगवासी केरॊ शेष माँगॊ पर सकारात्मक पहल करतै.

अंग उत्थानान्दोलन समिति केरॊ केन्द्रीय अध्यक्ष, गौतम सुमन के अनुसार स्मार पत्र मॆं समिति केरॊ पुरानॊ माँगॊ कॆ दोहरैतॆं हुये आग्रह करलॊ गेलॊ छै कि पूर्व घोषित अंगिका अकादमी गठन कॆ यथशीघ्र करै के अलावा झारखंड केरॊ तर्ज पर बिहार लोक सेवा आयोग केरॊ परीक्षा मॆं अंगिका कॆ शामिल करलॊ जाय, स्कूल आरू कॉलेज स्तर केरॊ पाठ्यक्रमॊ मॆं अंगिका भाषा कॆ सम्मलित करलॊ जाय, अंग क्षेत्र केरॊ विश्वविद्यालय मॆं स्वतंत्र रूप सॆं अंगिका विभाग केरॊ स्थापना करलॊ जाय, अंग क्षेत्र केरॊ पर्यटन स्थल सब कॆ बढ़ावा दॆ करी कॆ यहाँकरॊ बंद परलॊ कल-कारखाना सब कॆ चालू करवैलॊ जाय, दूरदर्शन आरू आकाशवाणी केन्द्रॊ सॆं अंगिका भाषाई कार्यक्रम केरॊ प्रसारण स्वतंत्र आरू नियमित रूप सॆं कराबै के प्रबंध करलॊ जाय, अंग महाजनपद केरॊ सब्भॆ रेलवे स्टेशनॊ पर अंगिका भाषा मॆं सूचना केरॊ प्रसारण हुऎ, भारतीय संविधान केरॊ आठमॊ सूची मॆं अंगिका भाषा कॆ शामिल करलॊ जाय – एकरा लेली मुख्यमंत्री स्तर सॆं अनुशंसा हुऎ, मंदार, कोसी,विक्रमशीला आरू राजगीर महोत्सव सरीखा सरकारी स्तर पर अंग महोत्सव भी करैलॊ जाय.

गौतम सुमन

गौतम सुमन

अंग उत्थानान्दोलन समिति के कहना छै कि उक्त उल्लिखित माँग सिर्फ माँग ही नै छेकै बल्कि छह – सात करॊड़ अंगिकाभाषी केरॊ अधिकार छेकै, जेकरा लेली  समिति अनवरत संघर्ष करतॆं आबी रहलॊ छै. समिति आशा वयक्त करै  छै कि  मुख्यमंत्री नीतिश कुमार केरॊ सुशासन मॆं सब माँग वास्तविक स्वरूपॊं मॆं अंजाम तलक पहुँचतै. समिति केरॊ तरफ सॆं जॊर दॆकॆ कहलॊ गलॊ छै कि समिति अलग प्रांत केरॊ पक्ष मॆं नै तॆ कहियॊ रहै नै अखनी छै.  मैथिली केरॊ नाम पर अलग मिथिला राज्य केरॊ माँग के तरफ इशारा करतॆं हुऎ समिति कहै छै कि ऐन्हॊ प्रयास कॆ राजद्रोह सरीखा मानी कॆ दण्डनीय कार्यवाई होना चाहियॊ.

गत 3 मार्च,2015 कॆ मुख्यमंत्री नॆ  सुल्तानगंज मॆं 1710 करोड़ के लागत सॆं बनै वाला भागलपुर जिलान्तर्गत  सुल्तानगंज आरू खगङ़िया जिलान्तर्गत  अगुवानी घाट कॆ जोङ़ै वाला गंगा पुल केरॊ कार्यारंभ के उद्घाटन करै घड़ियाँ सबसॆं पहलॆ जय अंग – जय अंगिका केरॊ नारा देनॆ रहै. लागलॆ घोषणा भी करनॆ रहै कि बहुत जल्द राज्य मॆं अंगिका एकेडमी के गठन करी देलॊ जैतै. अंग उत्थानान्दोलन समिति  के अनुसार एकरा सॆं अंगिकाभाषी सिनी के मान-सम्मान आरू गौरव बढ़ी गेलॊ रहै. गौतम सुमन के कहना छै कि दुर्भाग्यवश इ घोषणा अखनी तलक घोषणा ही बनी कॆ रही गेलॊ छै जबकि बिहार-झारखंड केरॊ 21 जिला केरॊ 81 विधानसभा केरॊ अधिकांश विधायकॊं नॆ  भी घोषणा केरॊ स्वागत करतें आरू समिति केरॊ माँगॊ केरॊ अनुशंसा करतॆं  मुख्यमंत्री नीतिश कुमार  कॆ एकरा पर अमल लेली अनुरोध पत्र लिखनॆ छै.

अंग उत्थानान्दोलन समिति अंग – अंगिका कॆ वाजिब सम्मान आरू अधिकार दिलाबै लेली नीतिश कुमार सॆं सकारात्मक पहल के आग्रह करतॆंं कहनॆ छै कि तभिये सही मायनॆ मॆं अंगवासी कॆ न्याय मिलॆ पारतै.

Comments are closed.