अंग देश केरौ तीन सीट – राजमहल, दुमका, गोड्डा अन्तर्गत सात जिला मँ आय अंतिम चरण के मतदान ।

दुमका । १९ मई, २०१९ । अंग देश केरौ तीन सीट – राजमहल, दुमका, गोड्डा मँ आय अंतिम चरण के मतदान करलौ जाय रहलौ छै । ई तीन लोकसभा सीट अन्तर्गत अंग देश केरौ छो जिला – साहेबगंज,पाकुड़,दुमका,गोड्डा,जामताड़ा आरू देवघर मँ वोट डाललौ जैतै । तीनों सीट प भोरे सात बजे सँ साँझैं चार बजे तलक मतदान होतै । अंग देश केरौ ई तीन सीटौ प कुल ४५६४६८१ मतदाता ४२ प्रत्याशी केरौ भाग्य के फैसला करतै ।

अंतिम चरण मँ होय रहलौ अंग देश केरौ ई तीन लोकसभा क्षेत्र मँ सबसँ जादे १७१४८६२ मतदाता गोड्डा मँ छै । जबकि  राजमहल मँ १४५३५११ मतदाता आरू दुमका मँ १३९६३०८ मतदाता आपनौ मताधिकार के प्रयोग करतै । मरद मतदाता के संख्यां २३६४५४१ आरू जनानी मतदाता के संख्या २२००११९ छै । एकरौ अलावे २१ थर्ड जेंडर के मतदाता छै ।

गोड्डा लोकसभा सीट प भाजपा के निशिकांत दूबे आरू झाविमो केरौ प्रदीप यादव मँ मोकाबला छै । राजमहल लोकसभा सीट प भाजपा के हेमलाल मूर्मू आरू झामुमो केरौ विजय हांसदा मँ टक्कर छै । वहीं दुमका लोकसभा सीट प झामुमो के शिबू सोरेन आरू भाजपा के सुनील सोरेन मँ मुकाबला छै ।

ई तीनो सीटो प दुमका आरू राजमहल प झामुमो आरू गोड्डा सीट प भाजपा के कब्जा छै ।

तीन सीटौ पर मतदान लेली ६२५८ बूथ बनैलौ गेलौ छै । जेकरा मँ ४८९ बूथ शहरी क्षेत्रौ मँ छै जबकि ५७६९ बूथ ग्रामीण क्षेत्र मँ छै । एकरा मँ १७४५ बूथ अतिसंवेदनशील आरू २४६६ बूथ संवेदनशील छै । मतदान प्रक्रिया क संपन्न कराबै लेली ३७०० सुरक्षाकर्मी तैनात रहतै । जबकि दू हेलीकॉप्टर सँ बूथौ प नजर रखलौ जैतै । एगो एयर ऐंबुलेंस भी तैनात करलौ गेलौ छै ।

Comments are closed.

error: Content is protected !!