पटना /बाँका :  हिंदी आरू अंगिका केरऽ लब्धप्रतिष्ठ विद्वान डा. लखनलाल सिंह आरोही क॑ बिहार अंगिका अकादमी केरऽ पहलऽ अध्यक्ष बनैलऽ गेलऽ छै. इ संबंधी विस्तृत नोटिफिकेशन आज जारी होय वाला छै. बाँका  जिला केरऽ रजौन प्रखंडन्तर्गत खैरा ग्रामवासी डा. लखनलाल सिंह आरोही केरऽ अध्यक्ष पद पर नियुक्ति सं॑ अंगिका साहित्यकारऽ आरू विद्वान सीनी के बीच खुशी के लहर व्याप्त छै. अल्प समयावधि मं॑ बिहार अंगिका अकादमी केरऽ गठन संबंधी ठोस निर्णय लै वास्तें लोगें सीनी नं॑ एकरा लेली बिहार केरऽ माननीय मुख्यमंत्री के प्रति आभार प्रकट करतं॑ हुनकऽ प्रशंसा करल॑ छै.

डा. लखनलाल सिंह आरोही नं अंगिका.कॉम सं॑ फोन पर बात करतें हुऐ माननीय मुख्यमंत्री श्री नीतिश कुमार के प्रति आभार प्रकट करतं॑ कहलकै कि सरकार तरफ सं॑ सौंपलऽ गेलऽ इ महत्वपूर्ण जिम्मेवारी क॑ हृदय सं॑ स्वीकार करतं॑ हुऐ हुनी अंगिका भाषा, साहित्य, कला, संगीत आदि के विकास लेली समर्पित होय क॑ आपनऽ सेवा प्रदान करतै .

बिहार अंगिका अकादमी केरऽ पहलऽ अध्यक्ष - डा. लखनलाल सिंह आरोही

डा. लखनलाल सिंह आरोही

ज्ञातव्य छै एकरऽ पहले एगऽ ऐतिहासिक घटनाक्रम मं॑ 23 जून-2015 क॑ बिहार केरऽ कैबिनेट द्वारा अंगिका अकादमी केरऽ गठन क॑ मंजूरी देला के पश्चात  राज्य योजनान्तर्गत संकल्प संख्या – 15 / एम -4 – 01 /2015 -1251 द्वारा गत  30 जून ,2015 क॑ अंगिका अकादमी केरऽ विधिवत गठन करलऽ गेलऽ रहै .  कैबिनेट केरऽ बैठक मं॑ अंगिका अकादमी लेली तत्काल पाँच लाख रूपया टोकन स्वरूप सहायता अनुदान मंजूर भी करलऽ गेलऽ रहै. अंगिका अकादमी केरऽ गठन अंगिका भाषा क॑ संविधान केरऽ अष्टम सूची मं॑ शामिल करै के दिशा मं॑ एगऽ महत्वपूर्ण कदम मानलऽ जाय रहलऽ छै.

बिहार राज्य केरऽ पंद्रह जिला केरऽ लगभग चार करोड़ अंगिका भाषी, अंगिका भाषा आन्दोलन सं॑ जुड़लऽ साहित्यकार आरू संस्था सीनी सहित अंगिका भाषाविद केरऽ बरसऽ पुरानऽ माँग जून-2015 मं॑ पूरा होलऽ रहै. बिहार , झारखंड आरू पश्चिम बंगाल मं॑ सब मिलाय क॑ पाँच करोड़ सं॑ भी जादा लोगऽ द्वारा अंगिका बोललऽ जाय छै. एकरऽ अलावे अंगिका नेपाल, कम्बोडिया, वियतनाम, लाओस आदि देशऽ मं॑ भी बोललऽ जाय छै.

बिहार अंगिका अकादमी केरऽ  अध्यक्ष पद पर डा. लखनलाल सिंह आरोही केरऽ नियुक्ति सं॑ बिहार केरऽ पंद्रह अंगिकाभाषी जिला – अररिया, कटिहार, पुर्णिया, किसनगंज, मधेपुरा, सहरसा, सुपौल, भागलपुर, बाँका, जमुई, मुंगेर, लखीसराय, बेगूसराय, शेखपुरा, खगड़िया सहित झारखंड केरऽ सात अंगिकाभाषी जिला  - साहेबगंज, गोड्डा, देवघर, पाकुड़, दुमका, गिरीडीह, जामताड़ा आरू पश्चिम बंगाल केरऽ दू अंगिकाभाषी जिला  मालदा, उत्तर दिनाजपुर  मं॑ उत्सव के माहौल व्याप्त छै.

अंगिका.कॉम बिहार अंगिका अकादमी केरऽ पहलऽ अध्यक्ष केरऽ रूप मं॑ डा. लखनलाल सिंह आरोही केरऽ मनोनयन पर हुनका बधाई देतं॑ शुभकामना व्यक्त करै छै कि हुनी अंगिका भाषा , अंगिका भाषा साहित्य, अंगिका कला, अंगिका संस्कृति क॑ राष्ट्रीय आरू अंतर्राष्ट्रीय फलक पर पुनर्स्थापित करै के दिशा मं॑ पूरा जोर लगैतै.

Tags: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

Comments are closed.