दुलरिया
— सुधीर कुमार प्रोग्रामर —
गरजी गरजी बरसे करका बदरबा जे
कोनी ठीहां माचिया विछाबौ गे दुलरिया
झरिये में भींगी गेलै गेनरा भोथरबा जे
भींगी गेले अचरा के कोर गे दुलरिया ।
भींगी भींगी सुख्खी गेलौ छतिया के दूधबा जे
सुख्खी गेलौ आँखी केरो लोर गे दुलरिया
चाटी-चाटी लाल भेलौ हांथो के अंगुठबा से
लाले-लाले सुगनी के ठोर गे दुलरिया।
अरजै लै बाबू गेलौ, टकबा के ढेरिया जे
वहीं जाय के सुतलौं निभोंर गे दुलरिया
जागी-जागी सुती गेलौ मनो के सपनमां जे
सुती गेलै जिनगी के भोर गे दुलरिया।
Angika Poetry : Dularia
Poet : Sudhir Kumar Programmar