ताकि मिल॑ सक॑ ठनका के कहर सं॑ निजात

—  कुंदन अमिताभ —

बिना मौसम केरऽ बरसात मं॑ या मानसून केरऽ शुरूआती आरू अंतिम दौर मं॑ या कहीं – कहीं मानसून मं॑ भी जब॑ ठनका के कड़क आरू चमक के साथ गरदौआ झरिया केरऽ बौछार पड़ै छै त॑ धरती केरऽ आरू जीवऽ सथें मानव मऽन भी झमझम करी क॑ झूम॑ लागै छै. ठनका के कड़क आरू चमक सं॑ ऐन्हऽ शमां बँधै छै मानों प्रकृति कोनऽ विहंगम छटा बिखराबै ल॑ स्वर्ग सं॑ सोझे धरती पर आबी गेलऽ रह॑.तन-मन क॑ प्रसन्नता सं॑ भरी दै वाला इ ठनका भी हठात ऐन्हऽ भयावह रूप धरै छै कि मानव प्राण हरी क॑ ही दम लै छै. ऐन्हे हकीकत हाल मं॑ झारखंड मं॑ देखै ल॑ मिललऽ छै.

झारखंड राज्य के आपदा प्रबंधन विभाग केरऽ सचिव के कहना छै कि राज्य मं॑ बिजली गिरै के घटना यानि ठनका सं हताहत होय वाला के संख्या लगातार बढ़ी रहलऽ छै आरू इ एगऽ बड़ऽ आपदा के रूप ल॑ रहलऽ छै. पिछला तीन महीना मं॑ ठनका गिरला सं॑ लगभग अड़तालीस लोगऽ के मौत होय चुकलऽ छै, सौ सं॑ जादा लोग घायल होलऽ छै. साथें दर्जनों जानवर के जान भी ठनका चलतं॑ गेलऽ छै. खाली एक-दू जुलाय क॑ होलऽ झरिया मं॑ ही राज्य केरऽ अलग- अलग हिस्सा मं॑ ठनका गिरला सं॑ 13 लोगऽ के मौत होय गेलै. वास्तविक आँकड़ा ऐकरा सं॑ कहीं जादा हुऐ सकै छै, कैन्हेकि बहुत कारण सं॑ ग्रामीण क्षेत्र के ठनका सं॑ प्रभावित हर घटना के सूचना सरकार तलक पहुँचै नै पारै छै. जाहिर छै ठनका केरऽ आतंक सं॑ आहत झारखंड क॑ एकरा सं॑ जल्द सं॑ जल्द निजात पाबै के जरूरत छै.

आहत झारखंड क॑ केना मिलतै ठनका के कहर सं॑ निजात

आहत झारखंड क॑ केना मिलतै ठनका के कहर सं॑ निजात

ठनका सं॑ सबसं॑ जादा प्रभावित पहाड़ी क्षेत्र केरऽ गाँव मं॑ रहै वाला किसान आरू मजदूर होय छै जेकरऽ अधिकांश समय खुललऽ सरंग मं॑ बीतै छै. ठनका सं॑ होय वाला नुकसान कं॑ देखतं॑ हुऐ इ जानना जरूरी छै कि ठनका केना उत्पन्न होय छै आरू केना जानलेवा बनी जाय छै. साथें इ जानना जादा जरूरी छै कि ठनका सं॑ अपना आप क॑ केना बचैलऽ जाय.

जबे ठंडा हवा संघनित होय करी क॑ घटा बनाबै छै त॑ इ घटा के अंदर गर्म हवा के गति आरू नीचें तरफ ठंडा हवा होला सं॑ घटा मं॑ धनावेश ऊपर दन्नं॑ आरू ऋणावेश नीचे दन्नं॑ होय छै. घटा मं॑ इ विपरीत आवेश केरऽ आपसी क्रिया सं॑ विद्युत आवेश उत्पन्न होय छै. इ प्रकार ठनका के उत्पत्ति घटा मं॑ उपस्थित धनावेश आरू ऋणावेश केरऽ क्रिया स॑ होय छै. इ घटना के दौरान उत्पन्न विद्युत आवेश केरऽ तापमान सूर्य केरऽ सतही तापमान सं॑ लगभग 4 गुना अधिक हुऐ सकै छै. ठनका सं॑ अल्प समय मं॑ ही अधिक नुकसान होय जाय छै. ठनका के अधिकतर घटना कोनऽ पेड़, बिजली केरऽ खंभा के आसपास या पहाड़ एन्हऽ उच्चऽ जग्घऽ पर होय छै.

ठनका गिरना असल मं॑ स्थैतिक ऊर्जा के रिलीज या निकलना ही होय छै जब॑ धरती आरू बादलऽ के बीच विद्युत चार्ज बिगड़ी जाय छै. सरल शब्दऽ मं॑ कहलऽ जाय त॑ इ सरंग मं॑ बहुत बड़ा इलेक्ट्रिक स्पार्क छेकै. जेकरा पर बिजली गिरै छै ओकरऽ शरीर पर ‘लाइटनिंग ट्री’ बनी जाय छै. एक बार के आसमानी बिजली एक अरब वोल्ट तक हुऐ सकै छै. एकरा सं॑ केकरऽ दिल के धड़कन रुक॑ सक॑ छै या हुनकऽ अंदरूनी अंग जल॑ सकै छै. ठनका सं॑ जान तं॑ जैथैं छै, एकरा प्रकोप मं॑ ऐला के बाद जोंय कोय बचियो जाय छै त॑ जिनगी भर विंकलगाँकता के दंश झेलै ल॑ मजबूर होय ल॑ पड़ै छै. ठनका चलतं॑ जेतना के मौत होय छै ओकरा सं॑ करीब दस गुणा जादा विकलांग बनै छै.

ठनका के दौरान जों कुछ सावधानी बरतलऽ जाय त॑ जान – माल के नुकसान पर बहुत हद तलक काबू पैलऽ जाबै सकै छै. ठनका के दौरान जंगल या बैहार मं॑ गाछ लगाँ आरू एकरऽ नीचे नै खड़ा होना चाहियऽ, एकरा सं अच्छा भींगत॑-भींगत॑ कोनऽ पक्का घरऽ मं॑ शरण लेना होय छै. ठनका के दौरान बिजली केरऽ खंभा आरू गाछ सं॑ दूर ही रहना चाहियऽ, धात्विक वस्तु सीनी सं॑ भी दूरी बनाय क॑ रखना चाहियऽ – लोहा या स्टील केरऽ डंडा वाला छाता नै उपयाग करना चाहियऽ. खेत – बैहार मं॑ जों फँसी गेलऽ छहऽ त॑ आपातस्थिति क॑ छोड़ी क॑ मोबाइल उपयोग नै करऽ. ठनका के दौरान कोनो पहाड़ी के चोटी पर खड़ा नै रहऽ.कोनो जलस्रोत (नदी, नहर, तालाब, झरना आदि) में तैरी या नहाय रहलऽ छहो त॑ निकली क॑ समतल भूमि पर चल्लऽ आबऽ. ठनका सं॑ बचाव लेली घरऽ, इमारतऽ के ऊपर तड़ितचालक लगवाना चाहियऽ. घरऽ के अंदर छहो त॑ ठनका के दौरान विद्युत उपकरण, टेलिफोन आदि के उपयोग नै करऽ.

ठनका गिरै के घटना सं॑ बचै लेली एकरऽ प्रति जनमानस क॑ जागरूक करै ल॑ होतै ताकि वू इ घटना सं॑ निपटै के वास्तें तैयार रह॑ आरू जान-माल के हानि भी नगण्य हुऐ सक॑.

Angika Samvad – Abri Dafi : अंगिका संवाद – अबरी दाफी  : ताकि मिल॑ सक॑ ठनका के कहर सं॑ निजात
Columnist (स्तंभकार) : Kundan Amitabh (कुंदन अमिताभ)

Comments are closed.