सुलतानगंज (भागलपुर)  : भारत केरऽ सभसं॑ बड़ऽ मेला मं॑ सं॑ एक, अंग क्षेत्र अंन्तर्गत सुलतानगंज केरऽ विश्व प्रसिद्ध  श्रावणी मेला कल सं॑ शुरू होय रहलऽ छै. अबरी दाफी श्रावणी मेला मं॑ देश विदेश सं॑ आबै वाला काँवरिया सब क॑ यहाँकरऽ मेला क्षेत्र मं॑ उपलब्ध सुविधा के जानकारी छह – छह भाषा मं॑ उपलब्ध करैलऽ जैतै . इ छह भाषा छेकै – हिंदी, अंगिका, नेपाली, बांग्ला, भोजपुरी आरू मैथिली.

हिंदी, अंगिका, नेपाली, बांग्ला, भोजपुरी आरू मैथिली भाषा मं॑ जानकारी के प्रसारण

गुरूवार क॑ नगर परिषद, सुलतानगंज केरऽ सामान्य बोर्ड के सभापति दयावती देवी केरऽ अध्यक्षता मं॑ होलऽ बैठक मं॑  काँवरिया सब क॑ छह – छह भाषा मं॑ जानकारी दै के निर्णय लेलऽ गेलै. केंद्रीय प्रचार व्यवस्था के तहत नगर मं॑ लगै वाला ध्वनि विस्तारक यंत्र सं॑ हिंदी, अंगिका, नेपाली, बांग्ला, भोजपुरी आरू मैथिली भाषा मं॑ जानकारी प्रसारित करलऽ जैतै.

देश विदेश सं॑ आबै वाला काँवरिया सब क॑ छह – छह भाषा मं॑ जानकारी के सुविधा दै के प्रयास के सराहना करतं॑ हुऐ कुछ संस्था न॑ मैथिली क॑ शामिल करै प॑ आश्चर्य जतैने छै. अखिल भारतीय अंग-अंगिका विकास मंच के श्री जय प्रकाश मिश्रा के कहना छै कि भारत के खाली दू टा जिला मधुबनी आरू दरभंगा मं॑ बोललऽ जाय वाला मैथिली भाषा के जगह प॑ कहीं अधिक व्यापक क्षेत्र मं॑ बोललऽ जाय वाला बज्जिका आरू मगही भाषा क॑ शामिल करना चाहियऽ. श्री मिश्रा के कहना छै कि   सुलतानगंज केरऽ श्रावणी मेला मं॑ नेपाल के अलावे आरू देशऽ सं॑ भी लोग आबै छै, ओकरा सबके सुविधा लेली आरू सुलतानगंज क॑ सचमुच के  एगो अंतर्राष्ट्रीय पर्यटन केंद्र मं॑ स्थापित करै लेली स॑ अंग्रेजी भाषा क॑ भी एकरा मं॑ शामिल करना चाहियऽ. कार्यपालक पदाधिकारी, श्री देवेन्द्र सुमन केरऽ अनुसार छह भाषा मं॑ प्रचार-प्रसार होला सं॑ मेला के महत्व क॑ बढ़ावा मिलतै.

angika_samvad_angika_in_Shravani_mela_announcement_FB_108

सुलतानगंज पहुँचै के राष्ट्रीय उच्च पथ प्रमंडल द्वारा निर्धारित सड़क मार्ग

हुन्न॑ भागलपुर लगाँकरऽ एनएच-80 पर स्थित चंपापुल आरू घोरघट पुल क्षतिग्रस्त होला के कारण वू रूट सं॑ सब प्रकार के भारी वाहन, बस, ट्रक आदि के परिचालन बैरियर लगला सं॑ बंद छै. इ लेली सं॑ भागलपुर तरफऽ सं॑ सुलतानगंज पहुँचै के राष्ट्रीय उच्च पथ प्रमंडल द्वारा निर्धारित रास्ता छेकै – भागलपुर सं॑ लोहिया पुल, गुड़हट्टा चौक, दाउदवाट, दरियापुर, सजौर, अमखोरिया, शिव शंकरपुर होत॑ हुअ॑ शाहकुंड, अकबरनगर के रास्ता तय करतें हुअ॑ सुलतानगंज पहुंचना. लखीसराय दन्नं॑ सं॑ सुलतानगंज पहुंचै के राष्ट्रीय उच्च पथ प्रमंडल द्वारा निर्धारित रास्ता छेकै : लखीसराय सं॑ जमुई, गंगटामोड़, संग्रामपुर, तारापुर होतं॑ हुऐ सुलतानगंज.

सुलतानगंज स्टेशन पर एक्सप्रेस, सुपरफास्ट एक्सप्रेस सहित अन्य इ रूट सं॑ गुजरै वाला सब ट्रेनऽ के ठहराव 

एक अगस्त सं॑ सुलतानगंज स्टेशन पर एक्सप्रेस, सुपरफास्ट एक्सप्रेस सहित अन्य इ रूट सं॑ गुजरै वाला सब ट्रेनऽ के ठहराव होतै. इ निर्णय श्रवणी मेला क॑ ल॑ क॑ रेलवे हेडक्वार्टर न॑ लेन॑ छै. ट्रेनऽ के ठहराव 30 अगस्त तक होतै. सुलतानगंज स्टेशन पर ट्रेनऽ के ठहराव लेली कम सं॑ कम दू मिनट के समय निर्धारित करलऽ गेलऽ छै. मालूम हुऐ कि बाबा बैद्यनाथ धाम जाय लेली देश-विदेश सं॑ आबै वाला कांवरिया पहन॑ सुलतानगंज ही पहुंचै छै. रेलवे प्रशासन न॑ यात्री सीनी सं॑ अपील करन॑ छै कि सुरक्षित यात्रा लेली छत पर यात्र नै कर॑. दोसरऽ तरफ रेलवे प्रशासन के इ भी कहना छै कि छत या इंजन पर यात्र करना कानूनन जुर्म छेकै आरू पकड़लऽ गेला पर कार्रवाई करलऽ जाब॑ सकै छै.

सुलतानगंज स्टेशन पर दू मिनट के ठहराव, ट्रेन केरऽ विस्तार

गाड़ी संख्या 1315/16, पटना-मालदा एक्सप्रेस, 12253/54, भागलपुर-यशवंतपुर एक्सप्रेस, 14003/04, नयी दिल्ली-न्यू फरक्का एक्सप्रेस, 15619/20, गया-कामाख्या एक्सप्रेस, 13423/24, भागलपुर-अजमेर एक्सप्रेस व 13429/30, मालदा-आनंद विहार एक्सप्रेस केरऽ सुलतानगंज स्टेशन पर दू मिनट के ठहराव देलऽ गेलऽ छै. वहीं मेला अवधि के दौरान गाड़ी संख्या 53616 गया-जमालपुर पैसेंजर व 53480 किउल-जमालपुर पैसेंजर ट्रेन केरऽ विस्तार सुलतानगंज तक होतै.

रविवार क॑ भी इंटरसिटी एक्सप्रेस

श्रवणी मेले के दैरान एक सं॑ 30 अगस्त तलक 13235/36 साहेबगंज-दानापुर इंटरसिटी एक्सप्रेस व 13401/02 भागलपुर-दानापुर इंटरसिटी एक्सप्रेस रविवार क॑ भी चलतै.

Tags: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

Comments are closed.