नई दिल्ली 21 फरवरी, 2017 । कैंपेन फॉर लैंग्वेज इक्वलिटी एंड राइट्स (CLEAR),  भारतीय भाषा समूह, मैथिली-भोजपुरी अकादमी आरू अंगिका.कॉम न॑ संयुक्त रूप स॑ मांग करल॑ छै कि देश म॑ अलग-अलग समुदाय केरऽ 38 भाषा क॑ यथाशीघ्र संवैधानिक दर्जा देलऽ जाय । 21 फरवरी क॑ अंतरराष्ट्रीय मातृभाषा दिवस केरऽ मौका पर दिल्ली मं॑ जमा होलऽ देशभर के भाषा कार्यकर्ता सिनी न॑ केंद्र सरकार स॑ मांग करल॑ छै कि 2004 म॑ सीताकांत महापात्रा समिति केरऽ सिफारिशऽ के अनुसार चिन्हित 38 भाषा क॑ संविधान केरऽ अष्टम अनुसूची म॑ तुरंत शामिल करलऽ जाय ।



नई दिल्ली स्थित प्रेस क्लब ऑफ इंडिया मं॑ आयोजित संयुक्त प्रेस कॉन्फेंस क॑ संबोधित करते अंगिका.कॉम केरऽ संस्थापक आरू अखिल भारतीय अंगिका साहित्य व कला मंच केरऽ उपाध्यक्ष कुंदन अमिताभ न॑ अंगिका क॑ एक अंतर्राष्ट्रीय भाषा बतैतें हअ॑ कहलकै कि अंगिका, बिहार, झारखंड, पं. बंगाल केरऽ पच्चीस जिला सहित दिल्ली, मुंबई, कोलकता, आदि नगरऽ म॑ रहै वाला करीब 6 करोड़ लोगऽ के भाषा छेकै । हुनी भारत सरकार स॑ माँग करलकै कि अंगिका, भोजपुरी सहित वू सब 38 भाषा क॑ संविधान केरऽ अष्टम अनुसूची मं॑ तुरंत शामिल कर॑ जे 2004 ई. केरऽ सीताकांत महापात्रा समिति केरऽ सिफारिश सूची मं॑ शामिल छै ।

श्री अमिताभ न॑ कहलकै कि मातृभाषा सिनी केरऽ संवर्धन व संरक्षण स॑ हिन्दी अधिक विकसित व समृद्ध होतै साथ ही भारतीय संस्कृति अधिक सशक्त होय क॑ विश्व पटल पर अपनऽ अलग पहचान बनैल॑ रखै मं॑ अधिक सक्षम होतै। हुनी कहलकै कि भाषा सभ्यता व संस्कृति केरऽ संवाहक होय छै जे समाज व लोगऽ क॑ परस्पर जोडै के काम करै छै। भाषा-भाषा मं॑ भेदभाव करला स॑ देशवासी मं॑ आपसी मतभेद, वैमन्स्यता व असमानता के भाव उत्पन्न होय छै जे अंततः देश केरऽ एकात्मक संस्कृति लेली ही नुकसानदेह छै। हुनी कहलकै कि जब॑ हम्मं॑ विदेशी भाषा अंग्रेजी क॑ बड़ा गर्व के साथ आत्मसात करी क॑ अपनऽ रोजमर्रा के जिंदगी मं॑ शामिल करी अपनऽ संस्कृति केरऽ एगो अहम हिस्सा बनाब॑ सक॑ छियै, त॑ अपनऽ-अपनऽ मातृभाषा  क॑ कैन्हं॑ नै। आजाद भारत केरऽ पूरा के पूरा सरकारी प्रणाली अंग्रेजी केरऽ विकास म॑ लगलऽ छै जबकि यहाँकरऽ मातृभाषा सिनी के संरक्षण व विकास दन्न॑ सरकार केरऽ ध्यान अपेक्षाकृत रत्ती भर भी नै छै । हुनी कहलकै कि ई तरह के सरकारी रवैया स॑ आम जनमानस मं॑ अपनऽ भाषा व संस्कृति के प्रति विलगाव व हीनभावना जाग्रत होय के खतरा हमेशा बरकरार रहै छै जिनकऽ शिकार अंततः पश्छिमि संस्कृति व अंग्रेजी भाषा क॑ अपनाबै हेतु विवश होय जाय छै । हुनी कहलकै कि शिक्षा केरऽ माध्यम, संचार माध्यम व रोजगार के भाषा बनैल॑ बगैर मातृभाषा सब के संरक्षण व संवर्द्धन संभव नै छै । रोजगार लेली आयोजित होय वाला विभिन्न प्रतियोगी परीक्षा सब मं॑ ऐच्छिक विषय केरऽ रूप मं॑ विभिन्न मातृभाषा क॑ अनिवार्य रूप स॑ शामिल करी क॑ इनकऽ महत्ता क॑ कायम करलऽ जाब॑ सकै छै ।

दिल्ली सरकार केरऽ दिल्ली स्थित मैथिली-भोजपुरी अकादमी केरऽ उपाध्यक्ष कुमार संजॉय सिंह न॑ कहलकै कि आज दू पीढ़ियऽ मं॑ मातृभाषा मं॑ आपसी संवाद नै होय पाबी रहलऽ छै , एकरऽ वजह ई छै कि आजकऽ बच्चा, बुजुर्गऽ के भाषा के साथ मेल नै बैठाब॑ पारै छै । ई वजह स॑ दूरी बढ़लऽ जाय रहलऽ छै। हुनी जोर द॑ करी क॑ मांग करलकै कि 2004  म॑ पारित सीताकांत महापात्रा समिति केरऽ सिफारिशऽ के अनुसार अंगिका सहित 38 भाषा सब क॑ संविधान केरऽ अष्टम अनुसूची मं॑ तुरंत शामिल करलऽ जाय। 

कैंपेन फॉर लैंग्वेज इक्वलिटी एंड राइट्स (CLEAR) केरऽ प्रेजिडेंट डॉक्टर जोगा सिंह न॑ बतैलकै कि भारत सरकार न॑ पिछला कई साल के दौरान अलग-अलग समितियऽ के सिफारिशऽ के आधार प॑ जोन भारतीय भाषा सब क॑ संविधान केरऽ 8वीं अनुसूची मं॑ शामिल करल॑ छै वू पैमाना क॑ नै लागू करी रहलऽ छै । एकरा स॑ भाषा केरऽ विविधता क॑ ल॑ करी क॑ सरकार केरऽ भेदभाव केरऽ नीति जाहिर होय छै। डॉक्टर जोगा सिंह न॑ कहलकै कि मातृभाषा का अधिकार हर जन के एगो ऐसनऽ मौलिक सांस्कृतिक अधिकार छेकै जे हुनका हुनकऽ आर्थिक, सामाजिक-सांस्कृतिक प्रणाली व राजनीतिक अधिकार स॑ संबद्ध करै छै ।

डॉक्टर जोगा सिंह न॑ कहलकै कि संयुक्त राष्ट्र संघ द्वारा अंतरराष्ट्रीय मातृभाषा दिवस केरऽ घोषणा केरऽ प्रमुख उद्देश्य ई छेलै कि विश्व मं॑ भाषाई व सांस्कृतिक विविधता आरू बहुभाषिता क॑ बढ़ावा मिल॑ । साथ ही विश्व म॑ लुप्त होय रहलऽ भाषा सब संरक्षित हुअ॑ । एकरऽ अलावे केंद्र सरकार न॑ दावा करन॑ छै है कि वू मातृभाषा आधारित बहुभाषीय शिक्षा क॑ बढ़ावा देतै जेकरा स॑ स्कूल ड्रॉप आउट दर क॑ कम करै मं॑ मदद मिलतै । ई संबंध मं॑ हमरऽ ई आग्रह छै कि सरकार केरऽ ई पहल क॑ सफल बनाबै लेली  2004 मं॑ पारित सीताकांत महापात्र समिति केरऽ सिफारिशऽ के अनुसारसब्भे  38 भाषा क॑ संविधान केरऽ 8वीं अनुसूची मं॑ तुरंत शामिल करलऽ जाय ।

दिल्ली स॑ भारतीय भाषा सब मं॑ समाचार प्रसारण केरऽ व्यवस्था क॑ देशभर मं॑ फैललऽ आकाशवाणी केरऽ अलग-अलग केंद्रऽ मं॑ ट्रांसफर करै के फैसला के भी विरोध करलऽ गेलऽ छै। भारतीय भाषा समूह केरऽ दीपक ढोलकिया न॑ कहलकै कि भारतीय भाषा सब के समाचार प्रसारण क॑ दिल्ली स॑ देश केरऽ अलग-अलग रेडियो सेंटर दन्न॑ फेंकै के फैसला के भी हुनी विरोध करै छै । हुनी कहलकै कि ई एगो लंबा योजना के हिस्सा छेकै, जेकरा मं॑ भारतीय भाषा सब के दर्जे क॑ स्थानीय भाषा के रूप म॑ कम करना शामिल छै। हुनी कहलकै कि देश म॑ एगो राष्ट्रीय भाषा नै छै आरू आकाशवाणी न॑ एगो योजना के अनुसार भारतीय भाषा सब लेली लंबा अरसा स॑ अपॉइंटमेंट बंद करी क॑ रखन॑ छै ।

कैंपेन फॉर लैंग्वेज इक्वलिटी एंड राइट्स (CLEAR) केरऽ उपाध्यक्ष आनंद गुरु न॑ कहलकै कि एयरपोर्ट हुअ॑ या सरकार केरऽ विज्ञापन, दिल्ली हुअ॑ या तमिलनाडु खाली अंग्रेजी आरू हिंदी म॑ ही सब बात लिखलऽ रहै छै ।

कैंपेन फॉर लैंग्वेज इक्वलिटी एंड राइट्स (CLEAR) केरऽ साकेत एस. साहू न॑ कहलकै कि उड़ीसा मं॑ कोसली भाषा क॑ उड़िया भाषा केरऽ वर्चस्वता के शिकार होय ल॑ पड़ी रहलऽ छै । जबकि कोसली भाषा भाषी करोड़ों म॑ छै । हुनी कहलकै कि जब॑ कोसली भाषा-भाषी भी टैक्स केरऽ पेमेंट करी क॑ देश केरऽ विकास मं॑ आर्थिक योगदान करै छै त॑ कोसली भाषा क॑ सरकारी संरक्षण कैन्हें नै देलऽ जाय छै । हुनी माँग करलकै कि कोसली भाषा क॑ यथाशीघ्र संविधान केरऽ अष्टम सूची मं॑ शामिल करलऽ जाय ।

जन चेतना अभियान केरऽ अश्विनी कुमार न॑ कहलकै कि संविधान केरऽ धारा 348, 343(1)-(2), 351, 120, 210, 147 म॑ व्यापक संशोधन केरऽ माध्यम स॑ सर्वोच्च न्यायालय स॑ ल॑ करी क॑ निचलऽ अदालतऽ तक के कार्यवाही व प्रत्येक स्तर के शासन-प्रशासन, उच्च शिक्षा, रोजगार के परीक्षा स॑ अंग्रेजी के अनिवार्यता समाप्त करी भारत केरऽ समस्त जन-भाषा सब क॑ कानून, शासन-प्रशासन, उच्च शिक्षा, रोजगार केरऽ भाषा बनाना चाहियऽ । हुनी कहलकै कि सरकारी महकमा मं॑ भारतीय भाषा सब के हैसियत अनुवाद के भाषा केरऽ छै । अपेक्षाकृत सरल हिन्दी (हिंदुस्तानी), व समस्त भारतीय भाषा ही अंग्रेजी केरऽ विकल्प छेकै ।

तेलंगाना केरऽ रमेश आर्या न॑ कहलकै कि उनकऽ मातृभाषा बंजारा क॑ बोलै वाला के संख्या लगभग 6 करोड़ छै, पर भाषा व साहित्य विकास हेतु कोय भी सरकारी सुविधा उपलब्ध नै छै । हुनी माँग करलकै कि बंजारा भाषा क॑ यथाशीघ्र संविधान केरऽ अष्टम सूची मं॑ शामिल करलऽ जाय ।

भारतीय भाषा समूह केरऽ श्री अनिल चमरिया, कैंपेन फॉर लैंग्वेज इक्वलिटी एंड राइट्स (CLEAR) केरऽ श्री सेंथिल नाथन, श्री रॉवेल सिंह, दिप्यमान चक्रवर्ती, जसपाल सिंह सिधु, आदि न॑ भी सभा मं॑ अपनऽ विचार व्यक्त करलकै ।

ज्ञातव्य छै कि 2004 ई. मं॑ सीताकांत महापात्रा समिति द्वारा निम्नांकित 38 भाषा क॑ संविधान केरऽ अष्टम अनुसूची मं॑ शामिल करै लेली अनुशंसित करलऽ गेलऽ छै :-अंगिका, बंजारा, बज्जिका, भोजपुरी, भोती, भोटिया, बुंदेलखंडी, छत्तीसगढ़ी, धात्की, अंग्रेजी, गढ़वाली (पहाड़ी), गोंडी, गुज्जर या गुज्जरी, हो, काचाछी, कामतापुरी, करबी, खासी, कोदवा (कूर्ग), कोक बराक, कुमाउनी (पहाड़ी),  कुरक, कोसली, लेपचा, लिम्बु, मिजो (लुशाई), मगही, मुंडारी, नागपुरी, निकोबारीज, पहाड़ी (हिमाचली), पाली, राजस्थानी, शौर्सेनी (प्राकृत), सिरैकी, टेनइडी, टूलू । ( Angika, Banjara, Bajjika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar or Gujjari, Ho, Kaachachhi, Kamtapuri, Karbi, Khasi, Kodava (Coorg), Kpk Barak, Kumaoni(Pahari), Kurak, Kosali, Lepcha, Limbu, Mizo,(Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Shaurseni (Prakrit), Tenyidi, Tulu )

Tags: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

Comments are closed.