नई दिल्ली  : दिल्ली केरऽ आनंद विहार टर्मिनस पर रेल यात्री सीनी लेली हाल ही मं॑ क्षेत्रीय भाषा सीनी मं॑ उद्घोषणा प्रारंभ करलऽ गेलऽ छै. नई दिल्ली  केरऽ अखबारऽ मं॑ छपलऽ खबर सं॑ पता चलै छै कि उद्घोषणा मं॑  बिहार केरऽ खाली मैथिली आरू भोजपुरी भाषा क॑ ही शामिल करलऽ गेलऽ छै. ट्रेन मं॑ नित्य दिन होय वाला अपराधऽ सं॑ यात्री सीनी क॑ सचेत करै लेली ही रेलवे द्वारा क्षेत्रीय भाषा सीनी मं॑ उद्घोषणा प्रारंभ करलऽ गेलऽ छै. इ प्रयोग अारू रेलवे स्टेशनऽ पर भी करै के योजना छै. अंगिका भाषा मं॑ उद्घोषणा के कहीं उल्लेख नै मिलै छै. रेलवे मंत्रालय आरू प्रशासन सं॑ हमरऽ माँग छै कि अंगिका भाषा क॑ भी रेलवे केरऽ उद्घोषणा मं॑ शामिल करलऽ जाय. दिल्ली केरऽ रेलवे स्टेशनऽ सहित मुंबई, हावड़ा, पटना, राँची, जमशेदपुर, भागलपुर, सुलतानगंज, कटिहार,देवघर, पुर्णिया, मालदा, साहेबगंज, सहरसा, मधेपुरा,दुमका आरू अन्य महत्वपूर्ण स्टेशनऽ सं  होय रहलऽ रेलवे केरऽ उद्घोषणा मं॑ अंगिका भाषा क॑ शामिल करलऽ जाय. लाखों के संख्या मं॑ सफर करै वाला अंगिका भाषा – भाषी क॑ एकरा सं॑ बहुत राहत मिलतै.

रेलवे स्टेशन परिसरऽ आरू ट्रेनऽ मं॑ यात्रा के दौरान अपराधियऽ पर अंकुश लगाना रेल प्रशासन के सामनं॑ बहुत बड़ऽ चुनौती छै. इ लेली रेलवे न॑ विशेष हेल्पलाइन 1512 शुरू करै के साथ ही यात्री सीनी क॑ जागरूक करना भी शुरू करी देन॑ छै. एकरा लेली स्थानीय भाषा सीनी मं॑ उद्घोषणा करलऽ जाय रहलऽ छै. रेलवे अधिकारियऽ के कहना छै कि ट्रेन मं॑ जहरखुरानी के घटना अक्सर होतें रहै छै. बिहार आरू उत्तर प्रदेश तरफ जाबै वाला यात्रियऽ मं॑ ग्रामीण पृष्ठभूमि आरू मजदूरऽ के संख्या ज्यादा होय छै. अपराधी हिनका आसानी सं॑ शिकार बनाय लै छै. यात्री सीनी क॑ नशीला पदार्थ खिलाय क॑ लूटपाट करै छै. इ लेली स॑ हुनका सीनी क॑ हुनके भाषा मं॑ सचेत करलऽ जाय रहलऽ छै. आनंद विहार टर्मिनल सं॑ पूर्व दिशा  दन्न॑ जाय वाला ट्रेनें चलै छै, इ लेली सं॑ यहां मैथिली आरू भोजपुरी के प्रयोग करलऽ जाय रहलऽ छै.

अधिकारियऽ के कहना छै कि अंग्रेजी आरू हिंदी मं॑ उद्घोषणा करी क॑ यात्रियऽ क॑ त॑ सचेत करले जाय छै. पर बहुत्ते लोग अंग्रेजी नै समझ॑ सकै छै. अपनऽ भाषा मं॑ होय वाला उद्घोषणा क॑ यात्री ज्यादा ध्यान सं॑ सुनै छै. इ लेली ऐन्हऽ फैसला करलऽ गेलै कि जोन दिशा मं॑ जाय वाला ट्रेन होतै वहांकरऽ भाषा मं॑ उद्घोषणा करी क॑ यात्रियऽ क॑ अनजान व्यक्ति सं॑ जादा मेल मिलाप नै करै के तथा ओकरऽ द्वारा देलऽ गेलऽ खाय-पिऐ के सामान ग्रहण नै करै लेली सचेत करलऽ जाय. इ तरह के प्रयोग लगभग सब्भे बड़ऽ स्टेशनऽ पर करै के योजना छै, लेकिन एकरा मं॑ व्यवहारिक दिक्कत भी छै. दरअसल आनंद विहार सं॑ अधिकतर ट्रेन एक्के  दिशा दन्न॑ जाय लेली खुलै छै. इ लेली यहां ऐन्हऽ प्रयोग आसानी सं॑ करलऽ जाय रहलऽ छै, लेकिन नई दिल्ली, पुरानी दिल्ली सहित आरू रेलवे स्टेशनऽ सं॑ एक ही समय मं॑ कईएक दिशा लेली ट्रेन रवाना होय छै.  ऐन्हऽ स्थिति मं॑ कोनो क्षेत्रीय भाषा मं॑ उद्घोषणा करना आसान नै छै.

रेलवे मंत्रालय आरू प्रशासन सं॑ अंगिका.कॉम निवेदन करै छै कि लाखों के संख्या मं॑ सफर करै वाला अंगिका भाषा – भाषी क॑ ध्यान मं॑ रखतं॑ हुअ॑ अंगिका भाषा क॑ भी रेलवे केरऽ उद्घोषणा मं॑ शामिल करलऽ जाय. दिल्ली केरऽ रेलवे स्टेशनऽ सहित मुंबई,  हावड़ा,पटना, राँची, जमशेदपुर, भागलपुर, सुलतानगंज, कटिहार,देवघर, पुर्णिया, मालदा, साहेबगंज, सहरसा, मधेपुरा ,दुमका आरू अन्य महत्वपूर्ण स्टेशनऽ सं  होय रहलऽ रेलवे केरऽ उद्घोषणा मं॑ अंगिका भाषा क॑ शामिल करलऽ जाय.

angika_samvad_angika_in_railway_announcement_FB_107

Comments are closed.