सुलतानगंज: दिल्ली सरकार स॑ आग्रह करलऽ गेलऽ छै कि दिल्ली मं॑ अन्य भासा अकादमी ऐन्हऽ अंगिका भासा अकादमी के भी गठन करलऽ जाय ।

अखिल भारतीय अंगिका साहित्य कला मंच केरऽ महासचिव श्री सुधीर कुमार प्रोग्रामर न॑ दिल्ली केरऽ माननीय मुख्यमंत्री श्री अरविंद केजरीवाल क॑ पत्र लिखी क॑ एकरा लेली अनुरोध करन॑ छै । हुनकऽ कहना छै कि जेना बिहार मं॑ यहाँकरऽ पाँच करोड़ अंगिका भासा भासी केरऽ भावना के खयाल करतं॑ हुअ॑ माननीय मुख्यमंत्री श्री नितीश कुमारें बिहार अंगिका अकादमी केरऽ गठन करलक॑ । वोन्हैं दिल्ली मं॑ रही रहलऽ बिहार-झारखंड केरऽ नौ लाख अंगिका भासा भासी के भावना के खयाल करतं॑ हुअ॑ वहाँ अंगिका अकादमी केरऽ गठन करलऽ जाय ।

अखिल भारतीय अंगिका साहित्य कला मंच के कहना छै कि फिलहाल झारखंड लोक सेवा आयोग केरऽ परीक्षा मं॑ अंगिका के ३० अंक के सवाल पुछलऽ जाय छै । जबकि झारखंड केरऽ शिक्षक प्रतियोगी परीक्षा , सिपाही बहाली परीक्षा मं॑ भी अंगिका के ३० – ३० अंक केरऽ सवाल पुछलऽ जाय छै । पारा शिक्षक केरऽ बहाली मं॑ अंगिका के २० अंकऽ के सवाल रहै छै । वहीं फॉरेस्ट गार्ड बहाली परीक्षा मं॑ अंगिका हिन्दी सं॑ ८० अंकऽ के सवाल रहै छै ।

मंच केरऽ महासचिव श्री सुधीर कुमार प्रोग्रामर के कहना छै कि बिहार सरकार केरऽ उदारवादी पहल प॑ तिलकामाँझी भागलपुर विश्वविद्यालय मं॑ बी.ए. आरू एम.ए. पाठ्यक्रम मं॑ अंगिका के पढ़ाई जारी छै । बिहार केरऽ प्राइमरी इसकूली केरऽ दुसरा वर्ग तलक  माध्यम भासा के रूपऽ मं॑ लोकभासा मं॑ पढ़ाय के निर्देस देलऽ गेलऽ छै जेकरा मं॑ अंगिका भी सामिल छै । अंगिका संस्कार गीत केरऽ प्रकासन भी बिहार सरकार द्वारा करलऽ गेलऽ छै । एकरऽ अलावे बिहार सरकार न॑ २०१५ ई. मं॑ बिहार अंगिका अकादमी के गठन करी क॑ प्रो. (डॉ.) लखनलाल सिंह आरोही क॑ एकरऽ अध्यक्ष बनैल॑ छै ।

श्री प्रोग्रामर के अनुसार अंगिका क॑ एकरऽ मोकाम तलक पहुँचाबै मं॑ अंगिका के चर्चित साहित्यकार सर्वश्री राहुल सांकृत्यायन, फणीश्वर नाथ रेणु, रामधारी सिंह दिनकर, अनुपलाल मंडल, लक्षमी नारायण सुधांशु, डोमन साहू समीर, महेश्वरी सिंह महेश, डॉ. कमेश्वर शर्मा, डॉ. परमानंद पाण्डेय, सुमन सूरो, डॉ. नरेश पाण्डेय चकोर, डॉ. तेजनारायण कुशवाहा, डॉ. अमरेन्द्र,  आमोद कुमार मिश्रा, हीरा प्रसाद हरेन्द्र. कुंदन अमिताभ, विजेता मुदगलपुरी, मीरा झा, सान्त्वना साह, डॉ. विद्या रानी, डॉ. मृदुला शुक्ला, परमानंद प्रेमी, दिनेश बाबा तपन, सुधीर कुमार प्रोग्रामर, प्रदीप प्रभात, कैलाश झा किंकर, चन्द्रप्रकाश जगप्रिय, नरेश जनप्रिय, अनिरूद्ध प्रसाद विमल, धन्ञजय मिश्र, जनार्दन मिश्र, फतह बहादुर सिंह, संतलाल मंडल, डॉ. बहादुर मिश्र, डॉ. मधुसूदन झा आरनि के काफी योगदान रहलऽ छै ।

Comments are closed.