आम आदमी केरऽ आपनऽ राष्ट्रपति रहै अब्दुल कलाम

—  कुंदन अमिताभ —

एक विलक्षण व्यक्तित्व, आम आदमी केरऽआपनऽ राष्ट्रपति हमेशा लेली अलविदा कही गेलै. भारत केरऽ ‘अग्नि’ मिसाइल क॑ उड़ान दै वाला मशहूर वैज्ञानिक आरू पूर्व राष्ट्रपति एपीजे अब्दुल कलाम नै रहलै. शिलांग आईआईएम मं॑ लेक्चर देतं॑ हुनका दिल के दौरा पड़लै. आनन-फानन मं॑ अस्पताल पहुँचैलऽ गेलै. डॉक्टर कुछ नै कर॑ सकलकै, 83 बरस केरऽ ‘भारत रत्न’ कलाम 27 जुलाई -2015 ई. साँझै दुनिया क॑ विदा करी चुकलऽ रहै. पूर्व राष्ट्रपति एपीजे अब्दुल कलाम केरऽ असामयिक निधन अविश्वसनीय लागी रहलऽ छै.

आम आदमी केरऽ राष्ट्रपति अब्दुल कलाम प्रेरणास्त्रोत बनी क॑ युवा वर्ग के हमेशा मार्गदर्शन करतं॑ रहै छैलै. हुनी कहै छेलै जे सपना देखला के बाद ही ओकरा सच मं॑ तब्दील करलऽ जाब॑ पार॑. हुनी कहै छेलै जे खुललऽ आँखी सं॑ बड़ऽ सं॑ बड़ऽ सपना देखै के हिसकऽ डाली लेना चाहियऽ. बोलै छेलै जे सफलता लेली मुश्किल के सामना करना जरूरी छै. हुनी कहै छेलै जे विद्यार्थी केरऽ सर्वोत्तम गुण छेकै ओकरऽ द्वारा बेहिचक प्रश्न करना जेकरा सं॑ विषय विशेष क॑ भली भाँति समझलऽ जाब॑ पार॑. भ्रष्टाचार मुक्त भारत निर्माण के मसला पर मंत्वय देतं॑ हुनी बोलै रहै जे माय-बाबू-शिक्षक देश क॑ भ्रष्टाचार मुक्त करै मं॑ महत्वपूर्ण रोल अदा कर॑ सकै छै. हुनकऽ इ मानना रहै जे भगवान ओकरे मदद करै छै जे खुद मेहनत करै छै. हुनी हमेशा लीक सं॑ हटी क॑ सोचै पर आरू नया-नया अविष्कार करै पर बल दै रहै. हुनी आपनऽ इ विचारऽ क॑ आपनऽ जीवन म॑ रोज-रोज जियै रहै. angika_samvad_FB_106

एपीजे अब्दुल कलाम केरऽ पूरा नाम रहै- अवुल पकिर जैनुल्लाब्दीन अब्दुल कलाम . हुनी एगऽ मच्छीमार के बेटा रहै. जीवन के शुरुआत मं॑ अखबार बेची क॑ परिवार केरऽ जीवन यापन लेली आपनऽ बाबू के मदद तं॑ करथैं रहै खुद केरऽ पढ़ाय के खरचा भी ओखरै सं॑ निकालै रहै. इह॑ मच्छीमार के बेटा देश केरऽ चोटी के वैज्ञानिक बनलै आरू फिर बाद मं॑ जाय क॑ राष्ट्रपति पद क॑ भी शोभायमान करलकै. कलाम करोड़ों युवा सीनी के प्रेरणास्रोत रहै. अपनऽ वाक कला सं॑ हजारों के भीड़ क॑ मंत्र-मुग्ध करै रहै. युवा सीनी मं॑ नया करै के जोश आरू हौसला भरतें रहै छेलै. दू दर्जन किताबऽ मं॑ आपनऽ अनुभव के निचोड़ पेश करलकै. लेकिन अंत तक खुद क॑ एक ‘लर्नर’ बतैतं॑ रहलै. राष्ट्रपति पद सं॑ हटला के बाद भी एगऽ साइंटिस्ट, टीचर, लर्नर, राइटर के रूप मं॑ हुनी 2020 तक भारत क॑ आर्थिक रूप सं॑ समृद्ध बनाबै के मिशन पर काम करतें रहलै.

एपीजे अब्दुल कलाम केे जन्म 15 अक्टूबर 1931 क॑ दक्षिण भारतीय राज्य तमिलनाडु केरऽ रामेश्वरम मं॑ होलऽ रहै. पेशा सं॑ नाविक कलाम केरऽ पिता जादा पढ़लऽ लिखलऽ नै रहै. हिनी आपनऽ नाव  मछुआरा सब क॑ किराया पर लगाबै रहै. पांच भाय आरू पांच बहिन वाला परिवार क॑ चलाबै लेली बाबू लगाँ पैसा कम पड़ी जाय रहै. इ लेली शुरुआती  शिक्षा जारी रखै लेली कलाम क॑ अखबार बेचै के काम भी करै ल॑ पड़लै.

आठ साल केरऽ उम्र सं॑ ही कलाम भोरे चार बजे उठै रहै आरू नहाय करी क॑ गणित के पढ़ाय करै ल॑ चल्ली जाय रहै. सुबह नहाय क॑ जाय के पीछे कारण इ रहै कि हर साल पांच बच्चा क॑ मुफ्त मं॑ गणित पढ़ाबै वाला हुनकऽ टीचर बिना नहैने ऐलऽ बच्चा क॑ नै पढ़ाबै रहै. ट्यूशन स॑ ऐला के बाद कलाम नमाज पढ़ै रहै आरू ओकरऽ बाद वू सुबह आठ बजे तलक रामेश्वरम रेलवे स्टेशन आरू बस अड्डा पर अखबार बांटतं॑ रहै छेलै. कलाम ‘एयरोस्पेस टेक्नोलॉजी’ मं॑ आबै के पीछे के वजह अपनऽ पांचमऽ क्लास के टीचर सुब्रह्मण्यम अय्यर क॑ बताबै छै. हुनी  फिजिक्स के पढ़ाई करलकै आरू मद्रास इंजीनियरिंग कॉलेज सं॑ एयरोनॉटिकल इंजीनियरिंग मं॑ पढ़ाई करलकै.

1962 मं॑ कलाम इसरो  पहुंचलै. हिनकऽ प्रोजेक्ट डायरेक्टर रहतें भारत न॑ आपनऽ पहलऽ स्वदेशी उपग्रह प्रक्षेपण यान एसएलवी-3 बनैलकै. 1980 मं॑ रोहिणी उपग्रह क॑ पृथ्वी के कक्षा केरऽ समीप स्थापित करलऽ गेलै आरू भारत अंतरराष्ट्रीय अंतरिक्ष क्लब के सदस्य बनी गेलै. कलाम न॑ एकरऽ बाद स्वदेशी गाइडेड मिसाइल क॑ डिजाइन करलकै. हुनी अग्नि आरू पृथ्वी ऐन्हऽ मिसाइल सब भारतीय तकनीक सं॑ बनैलकै.

1992 सं॑ 1999 तक कलाम रक्षा मंत्री के रक्षा सलाहकार भी रहलै. इ दौरान वाजपेयी सरकार न॑ पोखरण मं॑ दोसरऽ बार न्यूक्लियर टेस्ट भी करलकै आरू भारत परमाणु हथियार बनाबै वाला देशऽ मं॑ शामिल होय गेलै. कलाम न॑ विजन 2020 देलकै. जेकरऽ तहत कलाम न॑ भारत क॑ विज्ञान केरऽ क्षेत्र मं॑ तरक्की केरऽ जरिए 2020 तलक अत्याधुनिक करै के खास सोच भी प्रदान करलकै. कलाम भारत सरकार केरऽ मुख्य वैज्ञानिक सलाहकार भी रहलै.

1982 मं॑ कलाम क॑ डीआरडीएल (डिफेंस रिसर्च डेवलपमेंट लेबोरेट्री) केरऽ डायरेक्टर बनैलऽ गेलै. ओहे दौरान अन्ना यूनिवर्सिटी न॑ हुनका डॉक्टर के उपाधि सं॑ सम्मानित करलकै. कलाम न॑ तब॑ रक्षामंत्री केरऽ वैज्ञानिक सलाहकार डॉ. वीएस अरुणाचलम साथें इंटीग्रेटेड गाइडेड मिसाइल डेवलपमेंट प्रोग्राम (आईजीएमडीपी) केरऽ प्रस्ताव तैयार करलकै. स्वदेशी मिसाइलऽ के विकास लेली कलाम के अध्यक्षता मं॑ एगऽ कमेटी बनैलऽ गेलै.

सबसं॑ पहलऽ चरण मं॑ जमीन सं॑ जमीन पर मध्यम दूरी तक मार करै वाला मिसाइल बनाबै पर जोर रहै. दोसरऽ चरण मं॑ जमीन सं॑ हवा म॑ मार करै वाला मिसाइल, टैंकभेदी मिसाइल आरू रिएंट्री एक्सपेरिमेंट लॉन्च वेहिकल (रेक्स) बनाबै के प्रस्ताव रहै. पृथ्वी, त्रिशूल, आकाश, नाग नाम केरऽ मिसाइल बनैलऽ गेलै. कलाम न॑ आपनऽ सपना रेक्स क॑ अग्नि नाम देलकै. सबसं॑ पहल॑ सितंबर 1985 मं॑ त्रिशूल फिर फरवरी 1988 मं॑ पृथ्वी आरू मई 1989 मं॑ अग्नि के परीक्षण करलऽ गेलै. एकरऽ बाद 1998 मं॑ रूस साथं॑ मिली क॑ भारत न॑ सुपरसोनिक क्रूज मिसाइल बनाबै पर काम शुरू करलकै आरू ब्रह्मोस प्राइवेट लिमिटेड के स्थापना करलऽ गेलै. ब्रह्मोस क॑ धरती, आसमान आरू समुद्र कहीं भी दागलऽ जाब॑ सकै छै. इ सफलता के साथ ही कलाम क॑ मिसाइल मैन के रूप मं॑ प्रसिद्धि मिललै आरू हुनका पद्म विभूषण सं॑ सम्मानित करलऽ गेलै.

कलाम क॑ 1981 मं॑ भारत सरकार न॑ देश केरऽ सर्वोच्च नागरिक सम्मान, पद्म भूषण आरू फिर, 1990 मं॑ पद्म विभूषण आरू 1997 मं॑ भारत रत्न प्रदान करन॑ रहै. भारत केरऽ सर्वोच्च पद पर नियुक्ति सं॑ पहल॑ भारत रत्न पाबै वाला कलाम देश केरऽ केवल तीसरा राष्ट्रपति छेकै. हुनका सं॑ पहल॑ इ मुकाम सर्वपल्ली राधाकृष्णन आरू जाकिर हुसैन न॑ हासिल करन॑ रहै.

आम आदमी केरऽ आपनऽ राष्ट्रपति अब्दुल कलाम हमेशा आम आदमी केरऽ दिल मं॑ जिंदा रही क॑ समाज केरऽ मार्ग दर्शन करतं॑ रहतै.

Angika Samvad – Abri Dafi : अंगिका संवाद – अबरी दाफी  : आम आदमी केरऽ आपनऽ राष्ट्रपति रहै अब्दुल कलाम
Columnist (स्तंभकार) : Kundan Amitabh (कुंदन अमिताभ)

Comments are closed.