पटना : डॉ. नरेश पाण्डेय चकोर केरऽ याद मं॑ स्थापित डॉ. चकोर स्मृति अंगिका भाषा-साहित्य संग्रहालय व शोध संस्थान केरऽ उदघाटन  ९ अक्तूबर २०१६  क॑ हुनकऽ गाँधीनगर, बोरिंग रोड, पटना स्थित आवास पर समारोह पूर्वक सम्पन्न होलै ।

ज्ञातव्य छै कि डॉ. चकोर के निधन के पश्चात हुनकऽ आवास केरऽ एक हिस्सा क॑ हुनकऽ याद में ‘डॉ. चकोर स्मृति अंगिका भाषा-साहित्य संग्रहालय व शोध संस्थान’ में तब्दील करी देलऽ गेलऽ छेलै ।  अंगिका आरू हिन्दी केरऽ वरिष्ठ साहित्यकार डॉ. नरेश पाण्डेय चकोर केरऽ जन्म ३ जनवरी १९३८ ई. क॑ होलऽ रहै । १४ नवंबर २०१५ ई. क॑  हृदय गति रूकी गेला स॑ हुनकऽ  निधन होय गेलऽ रहै ।

डॉ. चकोर स्मृति अंगिका भाषा-साहित्य संग्रहालय व शोध संस्थान केरऽ उदघाटन समारोह ९ अक्तूबर २०१६ क॑ सांझै हुनकऽ गाँधीनगर, बोरिंग रोड, पटना स्थित आवास पर सम्पन्न होलै । समारोह केरऽ उदघाटन बिहार अंगिका अकादमी केरऽ अध्यक्ष प्रो. (डॉ.) लखन लाल सिंह आरोही नं॑ करलकै ।  डॉ चकोर अंगिका साहित्य सम्मेलन केरऽ तत्वावधान म॑ आयोजित ई कार्यक्रम के  अध्यक्षता श्री योगेन्द्र प्रसाद मिश्र न॑ करलकै जबकि  संचालन सम्मेलन केरऽ अध्यक्ष डॉ आर प्रवेश न॑ करलकै । । कार्यक्रम केरऽ संयोजक छेलै अंग माधुरी केरऽ मैनेजिंग एडिटर श्री विधु शेखर । कार्यक्रम मं॑ भाग लै वाला आरू महत्वपूर्ण लोगऽ मं॑ शामिल छेलै अंग माधुरी केरऽ प्रकाशिका श्रीमती द्रौपदी दिव्यांशु, श्री ओमप्रकाश पांडेय, श्री विभु रंजन दिवाकर,  श्रीमती प्रमिला  वर्मा, अंग माधुरी केरऽ मैनेजिंग एडिटर श्री इन्दु शेखर  आदि ।

समारोह केरऽ उदघाटन करतं॑ बिहार अंगिका अकादमी केरऽ अध्यक्ष प्रो. (डॉ.) लखन लाल सिंह आरोही नं॑ कहलकै कि ई एगो ऐतिहासिक पल छेकै । हुनी कहलकै कि अकादमी कार्यालय मं॑ चकोर कक्ष केरऽ स्थापना करलऽ जैतै । हुनी ई भी कहलकै कि चकोर जी के नाम सं॑ पुरस्कार भी वितरित करलऽ जैतै ।

ई अवसर प॑ जरूरतमंदऽ के सहायता व समाजसेवा केरऽ उद्देश्य सं॑ अंगिका समाज केरऽ स्थापना के घोषणा भी करलऽ गेलै । अंगिका समाज केरऽ प्रधान संरक्षक प्रो. (डॉ.) लखन लाल सिंह आरोही आरू संयोजक श्री विभु रंजन होतै ।

Chakor Museum

Comments are closed.